पुणे : खडकवासला धरण पूर्ण क्षमतेने भरल्यानंतर पुणे महानगरपालिकेच्या वतीने दरवर्षीप्रमाणे पारंपरिक पद्धतीने जलपूजनाचा कार्यक्रम उत्साहात पार पडला. महापौर मंजुषा नागपुरे यांच्या उपस्थितीत जलदेवतेला साडी, चोळी आणि नारळ अर्पण करून जलसंपदेबद्दल कृतज्ञता व्यक्त करण्यात आली. यावेळी पुणेकरांना वर्षभर मुबलक व नियमित पाणीपुरवठा व्हावा तसेच शहरावर पाण्याची कोणतीही टंचाई येऊ नये, अशी प्रार्थना करण्यात आली.
पावसाळ्यात धरण पूर्ण भरल्यानंतर जलस्रोतांप्रती आदर आणि कृतज्ञता व्यक्त करण्याच्या परंपरेचा भाग म्हणून हा कार्यक्रम दरवर्षी आयोजित केला जातो. जलसंधारणाचे महत्त्व, पाण्याचा जबाबदारीने वापर आणि नैसर्गिक संसाधनांबाबत जनजागृती करण्याचा संदेशही यावेळी देण्यात आला.
या कार्यक्रमास आमदार भीमराव (अण्णा) तापकीर, उपमहापौर परशुराम वाडेकर, नगरसेवक सोपान काका चव्हाण, सचिन मोरे, प्रसन्न दादा जगताप, सुभाष नाणेकर, भारत भूषण बराटे, नगरसेविका कोमल नवले, जयश्री भुमकर, सहकारी नगरसेवक, स्थानिक नागरिक, पुणे महानगरपालिकेचे अधिकारी व कर्मचारी तसेच पाटबंधारे विभागाचे अधिकारी व कर्मचारी मोठ्या संख्येने उपस्थित होते.
