पुणे : पुणे शहरासह जिल्ह्यात गेल्या दोन दिवसांपासून सुरू असलेल्या मुसळधार पावसाचा परिणाम आता ऐतिहासिक पर्यटनस्थळांवरही दिसून येत आहे. शुक्रवारी सकाळी किल्ले सिंहगडाच्या मुख्य प्रवेशद्वाराजवळील पायरी मार्गावर अचानक दरड कोसळल्याची घटना घडली. या घटनेत सुदैवाने कोणतीही जीवितहानी झाली नसली, तरी प्रशासनाने पर्यटकांना विशेष सावधगिरी बाळगण्याचे आवाहन केले आहे.
मिळालेल्या माहितीनुसार, दरड कोसळल्यानंतर तीन ते चार मोठे दगड थेट पायऱ्यांवर येऊन पडले. वनसंरक्षण समितीच्या सुरक्षारक्षकांनी सकाळच्या पाहणीदरम्यान हा प्रकार निदर्शनास आणला. त्यानंतर घटनास्थळाची पाहणी करून संबंधित यंत्रणेला माहिती देण्यात आली. वनसंरक्षण समितीचे अध्यक्ष पांडुरंग सुपेकर यांनी या घटनेला दुजोरा दिला असून, दरड नेमकी कोणत्या वेळी कोसळली याबाबत अद्याप स्पष्ट माहिती उपलब्ध नसल्याचे सांगितले.
यापूर्वीही चार दिवसांपूर्वी सिंहगड घाट रस्त्यावर किरकोळ दरड कोसळल्याने काही काळ वाहतुकीत अडथळा निर्माण झाला होता. मात्र, प्रशासनाने तातडीने जेसीबीच्या साहाय्याने माती आणि दगड हटवून रस्ता पुन्हा सुरू केला होता.
सध्या सिंहगड परिसरात मुसळधार पाऊस, दाट धुके आणि निसरडा पायरी मार्ग यामुळे अपघाताचा धोका वाढला आहे. त्यामुळे गडावर येणाऱ्या पर्यटकांनी अनावश्यक गर्दी टाळावी, सुरक्षिततेचे नियम पाळावेत आणि प्रशासनाच्या सूचनांचे काटेकोर पालन करावे, असे आवाहन करण्यात आले आहे.
पावसाळ्यात सिंहगडावर मोठ्या प्रमाणात पर्यटकांची गर्दी होत असते. मात्र, सध्याची हवामान परिस्थिती लक्षात घेता पुढील काही दिवस गडावर भेट देताना विशेष काळजी घेणे आवश्यक असल्याचे प्रशासनाने स्पष्ट केले आहे. दरम्यान, पायरी मार्गावरील पडलेले दगड हटविण्याचे काम युद्धपातळीवर सुरू असून, परिस्थितीवर संबंधित यंत्रणा सतत लक्ष ठेवून आहे.
