पुणे : पुणे शहरातील कात्रज परिसरात जुन्या वादातून एका तरुणावर भररस्त्यात जीवघेणा हल्ला झाल्याची घटना समोर आली आहे. आरोपींनी तरुणाला रस्त्यात अडवून शिवीगाळ करत लाथाबुक्क्यांनी मारहाण केली. त्यानंतर लोखंडी रॉडने वार करून गंभीर दुखापत केल्याचा आरोप करण्यात आला आहे. या प्रकरणी भारती विद्यापीठ पोलीस ठाण्यात सात जणांविरुद्ध गुन्हा दाखल करण्यात आला असून, एका आरोपीला अटक करण्यात आली आहे. उर्वरित आरोपींचा पोलीस शोध घेत आहेत.
काय आहे प्रकरण?
पोलिसांनी दिलेल्या माहितीनुसार, १४ जुलै २०२६ रोजी सायंकाळी साडेसहा ते सात वाजण्याच्या सुमारास ही घटना घडली. फिर्यादी प्रशांत घुमाळ हे कात्रज परिसरातून जात असताना आरोपींनी त्यांना अडवले. जुन्या कारणावरून वाद घालत आरोपींनी प्रथम शिवीगाळ केली आणि त्यानंतर हाताने, लाथाबुक्क्यांनी तसेच लोखंडी रॉडने मारहाण करून गंभीर दुखापत केली.
सात आरोपींविरोधात गुन्हा
या प्रकरणात प्रशांत दुगाळ याच्यासह त्याचे सहा साथीदार आणि इतर अनोळखी व्यक्तींविरुद्ध भारतीय न्याय संहितेच्या (बीएनएस) विविध कलमांनुसार गुन्हा दाखल करण्यात आला आहे. घटनेनंतर पोलिसांनी तातडीने कारवाई करत एका आरोपीला अटक केली असून, इतर आरोपींचा शोध सुरू आहे.
पोलीस तपास वेगात
या घटनेमागील नेमके कारण, हल्ल्याचे नियोजन आणि इतर आरोपींचा सहभाग याचा तपास भारती विद्यापीठ पोलीस करत आहेत. परिसरातील सीसीटीव्ही फुटेज, प्रत्यक्षदर्शींची माहिती आणि अन्य पुराव्यांच्या आधारे पुढील तपास सुरू असून, फरार आरोपींना लवकरच अटक करण्यात येईल, असा विश्वास पोलिसांनी व्यक्त केला आहे.
