पुणे : मराठी चित्रपटसृष्टीत सध्या 'देऊळ बंद 2' या चित्रपटाची जोरदार चर्चा सुरू आहे. प्रदर्शित झाल्यापासून प्रेक्षकांचा मोठा प्रतिसाद मिळालेल्या या चित्रपटाने बॉक्स ऑफिसवर तब्बल 100 कोटी रुपयांचा टप्पा पार केल्याची चर्चा रंगली आहे. या यशानिमित्त आयोजित करण्यात आलेल्या सक्सेस सेलिब्रेशननंतर अभिनेता गश्मीर महाजनी याने सोशल मीडियावर केलेली पोस्ट सध्या चर्चेचा विषय ठरली आहे.

पहिल्या भागातील राघव शास्त्री आजही प्रेक्षकांच्या लक्षात

सुमारे दशकापूर्वी प्रदर्शित झालेल्या 'देऊळ बंद' या चित्रपटात गश्मीर महाजनीने साकारलेला राघव शास्त्री हा नायक प्रेक्षकांच्या विशेष पसंतीस उतरला होता. त्यामुळे 'देऊळ बंद 2'मध्येही त्याचीच प्रमुख भूमिका असेल, अशी अपेक्षा अनेक चाहत्यांची होती. मात्र दिग्दर्शक प्रवीण तरडे यांनी यावेळी वेगळी कथा आणि नवे पात्र केंद्रस्थानी ठेवत चित्रपटाची मांडणी केली. चित्रपटात गश्मीरची छोटी पण लक्षवेधी उपस्थिती ठेवण्यात आली असून, त्याच्या भूमिकेलाही प्रेक्षकांनी दाद दिली.

गश्मीरची पोस्ट झाली व्हायरल

चित्रपटाच्या यशानिमित्त झालेल्या कार्यक्रमाचा फोटो गश्मीरची पत्नी गौरी महाजनी हिने सोशल मीडियावर शेअर केला होता. या छायाचित्रात प्रवीण तरडे, स्नेहल तरडे, मंगेश देसाई, विजू माने, अतुल तसेच केंद्रीय राज्यमंत्री मुरलीधर मोहोळ यांच्यासह अनेक मान्यवर कलाकार उपस्थित असल्याचे दिसून येते.

याच पोस्टला शेअर करत गश्मीरने, "100 कोटींची मेहनत आता फळाला आली आहे," असे म्हणत प्रवीण तरडे, स्नेहल तरडे आणि इतर सहकाऱ्यांचे अभिनंदन केले. तसेच "ज्यांच्या पाठीशी स्वामींचा आशीर्वाद आहे, त्या प्रत्येकाला 100 कोटी शुभेच्छा," असा भावनिक संदेश देत त्याने चित्रपटाच्या संपूर्ण टीमचे कौतुक केले.

आता 'मुळशी पॅटर्न 2'ची उत्सुकता

'देऊळ बंद 2'च्या यशानंतर आता प्रवीण तरडे यांच्या आगामी 'मुळशी पॅटर्न 2' या चित्रपटाची चर्चा रंगू लागली आहे. या चित्रपटात कोणते कलाकार दिसणार, याबाबत चाहत्यांमध्ये उत्सुकता वाढली आहे. दरम्यान, गश्मीर महाजनी लवकरच '108 बेस हॉस्पिटल उरी' या नव्या चित्रपटातून प्रेक्षकांच्या भेटीला येणार असल्याने त्याच्या चाहत्यांची उत्सुकताही शिगेला पोहोचली आहे.