पुणे : पुणे शहरात गुन्हेगारीच्या घटनांमध्ये सातत्याने वाढ होत असल्याचे चित्र पुन्हा एकदा समोर आले आहे. १६ जुलै रोजी शहरातील विविध पोलीस ठाण्यांमध्ये सायबर फसवणूक, भीषण रस्ते अपघात, चोरी, आत्महत्येस प्रवृत्त करणे आणि पिस्तूलाचा धाक दाखवून धमकी देणे अशा गंभीर स्वरूपाचे गुन्हे दाखल झाले आहेत. पुणे शहर पोलिसांनी प्रसिद्ध केलेल्या दैनिक प्रेस नोटमध्ये या घटनांची नोंद करण्यात आली असून, अनेक प्रकरणांचा तपास सुरू आहे. 

ऑनलाइन व्यवसायाच्या आमिषाने 21.70 लाखांचा गंडा

चंदननगर पोलीस ठाण्याच्या हद्दीत एका 45 वर्षीय व्यक्तीला सोशल मीडियावरून संपर्क साधत 'ड्रॉप शिपिंग' व्यवसायातून मोठा नफा मिळवून देण्याचे आमिष दाखवण्यात आले. विश्वास संपादन करून टप्प्याटप्प्याने 21 लाख 70 हजार 758 रुपये उकळण्यात आले. फसवणूक झाल्याचे लक्षात येताच पीडिताने पोलिसांत धाव घेतली असून अज्ञात सायबर भामट्यांविरोधात गुन्हा दाखल करण्यात आला आहे.

अल्पवयीन मुलाचा विजेच्या धक्क्याने मृत्यू

बंडगार्डन परिसरात मंडप उभारणीच्या कामासाठी 16 वर्षीय मुलाकडून सुरक्षा साधनांशिवाय काम करून घेतले जात असताना विजेचा धक्का लागून त्याचा मृत्यू झाला. निष्काळजीपणामुळे हा प्रकार घडल्याचा आरोप असून संबंधित व्यक्तीविरुद्ध गुन्हा दाखल करण्यात आला आहे.

वाघोलीत दोन भीषण अपघात; दोघांचा मृत्यू

वाघोली परिसरात एका अपघातात भरधाव डंपरने रस्त्याने चालत असलेल्या 57 वर्षीय पादचाऱ्याला चिरडले. अपघातानंतर चालकाने घटनास्थळावरून पळ काढला. तर दुसऱ्या घटनेत भरधाव टेम्पोने दुचाकीला धडक दिल्याने 24 वर्षीय तरुणाचा जागीच मृत्यू झाला, तर त्याचा मित्र गंभीर जखमी झाला. दोन्ही प्रकरणांचा पोलिसांकडून तपास सुरू आहे. 

पीएमटी बसमध्ये महिलेचे 1.40 लाखांचे दागिने लंपास

हडपसर परिसरात पीएमटी बसमध्ये प्रवास करत असलेल्या 58 वर्षीय महिलेच्या गळ्यातील सुमारे 1.40 लाख रुपये किमतीचे सोन्याचे दागिने गर्दीचा फायदा घेत अज्ञात महिलांनी चोरून नेले. या प्रकरणी चोरीचा गुन्हा दाखल करण्यात आला आहे.

व्यावसायिकाला आत्महत्येस प्रवृत्त केल्याचा आरोप

स्वारगेट पोलीस ठाण्याच्या हद्दीत व्यावसायिक खलील शेख यांच्या मृत्यूप्रकरणी आर्थिक व्यवहारातून सातत्याने होणारा त्रास, धमक्या आणि मानसिक छळ यामुळे आत्महत्येस प्रवृत्त केल्याप्रकरणी गुन्हा दाखल करण्यात आला आहे. या प्रकरणाचा अधिक तपास सुरू आहे.

स्टील खरेदीच्या नावाखाली 4.44 लाखांची फसवणूक

मार्केटयार्ड परिसरातील 62 वर्षीय व्यक्तीला स्टील खरेदीच्या व्यवहाराचे आमिष दाखवत अज्ञात सायबर भामट्यांनी 4 लाख 44 हजार रुपयांची ऑनलाइन फसवणूक केली. पोलिसांनी अज्ञात आरोपींविरोधात गुन्हा दाखल केला आहे.

रुग्णालयात डॉक्टराकडून पिस्तूलाचा धाक

हडपसरमधील खासगी रुग्णालयात उपचाराच्या बिलावरून झालेल्या वादात एका डॉक्टराने पिस्तूल दाखवत जीवे मारण्याची धमकी दिल्याचा आरोप करण्यात आला आहे. या प्रकरणी शस्त्रास्त्र कायद्यासह विविध कलमांनुसार गुन्हा दाखल करण्यात आला असून पुढील तपास सुरू आहे.