पुणे : पुण्यातील वाघोली परिसरात एका २० वर्षीय तरुणीवर प्रेमसंबंधाचा गैरफायदा घेत लैंगिक अत्याचार केल्याची धक्कादायक घटना समोर आली आहे. मुख्य आरोपीने तरुणीला लग्नाचे आमिष दाखवून तिच्यावर वारंवार अत्याचार केल्याचा आरोप आहे. तसेच तिचे खासगी व्हिडिओ चित्रीत करून ते सोशल मीडियावर प्रसारित करण्याची धमकी देत तिचा छळ करण्यात आल्याचे तक्रारीत नमूद करण्यात आले आहे.
याप्रकरणी वाघोली पोलिसांनी चार जणांविरुद्ध बलात्कार, गुन्हेगारी धमकी आणि इतर संबंधित कलमांन्वये गुन्हा दाखल केला आहे. फरहान रिझवान शेख (२०) आणि फजल शेख (२०, दोघे रा. विमाननगर) या दोघांना अटक करण्यात आली असून, न्यायालयाने त्यांना पोलीस कोठडी सुनावली आहे. तिसरा आरोपी साहिल दिंडोरे हा फरार असून त्याचा शोध सुरू आहे. चौथा आरोपी अल्पवयीन असल्याची माहिती पोलिसांनी दिली.
पोलिसांच्या माहितीनुसार, पीडित तरुणीची ओळख फरहान शेख याच्याशी झाली होती. या ओळखीचे पुढे प्रेमसंबंधात रूपांतर झाले. त्यानंतर लग्नाचे आश्वासन देत आरोपीने नोव्हेंबर २०२५ ते जून २०२६ या कालावधीत वाघोली आणि खराडी परिसरातील विविध ठिकाणी तिच्यावर वारंवार लैंगिक अत्याचार केल्याचा आरोप आहे.
तक्रारीनुसार, मुख्य आरोपीने आपल्या मित्रांनाही पीडितेवर अत्याचार करण्यास प्रवृत्त केले. तसेच या घटनेचे खासगी व्हिडिओ तयार करून ते इंटरनेटवर व्हायरल करण्याची धमकी देत पीडितेला सतत मानसिक दबावाखाली ठेवले.
दीर्घकाळ सुरू असलेल्या अत्याचार आणि धमक्यांना कंटाळून तरुणीने अखेर वाघोली पोलीस ठाण्यात तक्रार दाखल केली. त्यानंतर पोलिसांनी तत्काळ गुन्हा नोंदवत तपास सुरू केला आहे. तपासाच्या अनुषंगाने आरोपींचे मोबाईल, चॅट्स, कॉल रेकॉर्ड्स आणि इतर डिजिटल पुरावे जप्त करून त्यांची फॉरेन्सिक तपासणी केली जाणार असल्याचे पोलिसांनी सांगितले. या प्रकरणाचा पुढील तपास वरिष्ठ पोलीस निरीक्षक नंदकुमार गायकवाड यांच्या मार्गदर्शनाखाली सुरू आहे.
