मुंबई : महाराष्ट्र नवनिर्माण सेनेचे अध्यक्ष राज ठाकरे यांनी राज्याचे उच्च व तंत्र शिक्षणमंत्री चंद्रकांत पाटील यांच्यावर जोरदार टीका करत त्यांच्या वक्तव्यांवर प्रश्नचिन्ह उपस्थित केले. नव्या पिढीच्या अपेक्षा लक्षात घेऊन राज्यातील नेतृत्वाने आधुनिक विचार स्वीकारण्याची गरज असल्याचे सांगत त्यांनी चंद्रकांत पाटील यांच्या अलीकडील विधानाचा समाचार घेतला.
राज ठाकरे म्हणाले की, राज्याचे उच्च व तंत्र शिक्षणमंत्री म्हणून जबाबदारी सांभाळणाऱ्या व्यक्तीने विज्ञान, तंत्रज्ञान आणि वास्तव यांचा विचार करून बोलणे अपेक्षित आहे. आंदोलनादरम्यान फेकण्यात आलेल्या दगडांवरील फिंगरप्रिंट आधारशी जोडण्याबाबत केलेल्या वक्तव्याचा उल्लेख करत त्यांनी उपरोधिक शब्दांत चंद्रकांत पाटील यांच्यावर निशाणा साधला. अशा विधानांमुळे राज्यातील जेन झी पिढीमध्ये संभ्रम आणि नाराजी निर्माण होत असल्याचेही त्यांनी म्हटले.
यावेळी राज ठाकरे यांनी पंतप्रधान नरेंद्र मोदी यांनी सोशल मीडियावरील आक्षेपार्ह भाषेबाबत व्यक्त केलेल्या भूमिकेलाही प्रतिसाद दिला. कोणत्याही व्यक्तीविरोधात किंवा त्यांच्या कुटुंबीयांविषयी खालच्या स्तरावरील भाषा वापरणे चुकीचे असल्याचे मान्य करत, हा संदेश केवळ विरोधकांनाच नव्हे तर सत्ताधारी पक्षाशी संबंधित ट्रोल गटांनाही दिला जावा, अशी मागणी त्यांनी केली.
राज ठाकरे यांनी पुढे आरोप केला की, गेल्या काही वर्षांत सोशल मीडियावरील ट्रोल संस्कृती वाढीस लागली असून विविध राजकीय नेते, कलाकार आणि सार्वजनिक व्यक्तींना अश्लाघ्य भाषेचा सामना करावा लागत आहे. सभ्य राजकीय संवादासाठी सर्व पक्षांनी समान भूमिका घेण्याची गरज असल्याचे त्यांनी यावेळी अधोरेखित केले.
