पिंपरी चिंचवड : जुन्या आर्थिक देवाण-घेवाणीच्या वादातून झालेल्या भांडणाचे रूपांतर थेट गोळीबारात झाल्याची धक्कादायक घटना पिंपरी चिंचवड शहरातील जाधववाडी परिसरात घडली. ओलियो हॉटेलजवळ एका तरुणावर पिस्तूलातून गोळी झाडून त्याला जीवे मारण्याचा प्रयत्न करण्यात आला. या घटनेनंतर परिसरात एकच खळबळ उडाली.या प्रकरणी चिखली पोलिसांनी स्वप्नील कांताराम जाधव आणि त्याचा चालक रोशन पिंगळे यांच्याविरोधात भारतीय न्याय संहिता तसेच शस्त्र कायद्यानुसार गुन्हा दाखल केला असून दोघांनाही अटक करण्यात आली आहे.
पोलिसांनी दिलेल्या माहितीनुसार, फिर्यादी रवी धनाजी घोगरे हे 14 सप्टेंबर रोजी पहाटे सव्वादोनच्या सुमारास जाधववाडी येथील ओलियो हॉटेलजवळ आले होते. यावेळी जुन्या आर्थिक व्यवहारावरून त्यांचा आरोपींसोबत वाद झाला. वाद वाढल्यानंतर आरोपी स्वप्नील जाधव याने ‘तुला आज जिवंत सोडत नाही’ अशी धमकी देत पिस्तूलातून घोगरे यांच्या दिशेने गोळी झाडल्याचा आरोप आहे.या गोळीबारात घोगरे गंभीर जखमी झाले. त्यांना उपचारासाठी रुग्णालयात दाखल करण्यात आले असून त्यांची प्रकृती सध्या स्थिर असल्याची माहिती आहे.
घटनेची माहिती मिळताच चिखली पोलिसांनी तातडीने तपास सुरू करून दोन्ही आरोपींना अटक केली. पोलिसांनी आरोपींकडून गुन्ह्यात वापरलेले लोखंडी पिस्तूल, जिवंत राऊंड, वाहन आणि मोबाईल फोन जप्त केला आहे.या प्रकरणाचा पुढील तपास पोलीस निरीक्षक अमोल फडतरे यांच्या मार्गदर्शनाखाली सुरू आहे. जुन्या आर्थिक व्यवहाराच्या वादातून झालेल्या या गोळीबारामुळे जाधववाडी परिसरात मात्र मोठी खळबळ उडाली आहे.
