नाशिक : मालेगाव शहरात अवजड वाहनांच्या वाहतुकीचा प्रश्न पुन्हा एकदा ऐरणीवर आला आहे. शहरातील राष्ट्रीय एकात्मता चौकात हिंदुस्थान पेट्रोलियमच्या टँकरने दुचाकीला जोरदार धडक दिल्याने भीषण अपघात घडला. या दुर्घटनेत दुचाकीवरील महिलेचा जागीच मृत्यू झाला, तर एका चिमुकल्यासह पुरुष गंभीर जखमी झाल्याची माहिती समोर आली आहे. या घटनेमुळे परिसरात खळबळ उडाली असून नागरिकांकडून संताप व्यक्त केला जात आहे.
मिळालेल्या माहितीनुसार, मालेगाव शहरातील गजबजलेल्या राष्ट्रीय एकात्मता चौकात हा अपघात झाला. हिंदुस्थान पेट्रोलियमच्या टँकरची दुचाकीला जोरदार धडक बसली. धडक इतकी भीषण होती की, दुचाकीवरील महिलेचा जागीच मृत्यू झाला. या अपघातात दुचाकीवरील चिमुकला आणि एक पुरुष गंभीर जखमी झाले. अपघातानंतर जखमींना तातडीने रिक्षातून मालेगाव सामान्य रुग्णालयात उपचारासाठी नेण्यात आल्याची माहिती आहे. त्यांची प्रकृती गंभीर असल्याचे प्राथमिक वृत्त आहे.
अपघातानंतर वाहतूक विस्कळीत
या भीषण अपघातामुळे राष्ट्रीय एकात्मता चौक परिसरात नागरिकांची गर्दी झाली आणि रस्त्यावरील वाहतुकीचा खोळंबा झाला. घटनेची माहिती मिळताच स्थानिक पोलिसांनी घटनास्थळी धाव घेतली. वाहतूक सुरळीत करण्यासाठी पोलिसांकडून प्रयत्न करण्यात आले. भरवस्तीत अवजड वाहनामुळे झालेल्या या अपघाताने शहरातील वाहतूक व्यवस्थेचा प्रश्न पुन्हा चर्चेत आला आहे.
शहरात अवजड वाहनांना बंदी असतानाही प्रवेश?
मालेगाव शहरात सकाळच्या वेळेत अवजड वाहनांच्या वाहतुकीवर निर्बंध असतानाही अशी वाहने शहरात प्रवेश करत असल्याचा आरोप नागरिकांकडून केला जात आहे. नवीन बसस्थानक परिसरातही अवजड वाहनांमुळे वारंवार अपघात होत असल्याची तक्रार आहे. शहरातील अवजड वाहतुकीवर नियंत्रण आणण्याची मागणी यापूर्वीही करण्यात आली होती.
मालेगावकर विधायक समितीच्या वतीने या प्रश्नावर यापूर्वी ठिय्या आंदोलनही करण्यात आले होते. मात्र, त्यानंतरही शहरातील अवजड वाहनांच्या प्रवेशाचा प्रश्न कायम असल्याचे नागरिकांचे म्हणणे आहे. निर्बंध असतानाही अवजड वाहने शहरात नेमकी कशी दाखल होतात आणि त्यांच्यावर प्रभावी कारवाई का होत नाही, असे प्रश्न उपस्थित केले जात आहेत.
अवजड वाहतुकीवर नियंत्रण आणण्याची मागणी
आजच्या अपघातात एका महिलेचा मृत्यू झाल्याने आणि चिमुकल्यासह अन्य व्यक्ती गंभीर जखमी झाल्याने शहरातील नागरिकांमध्ये तीव्र नाराजी आहे. गजबजलेल्या चौकांमधून अवजड वाहनांची होणारी वाहतूक नियंत्रित करावी, वाहतूक नियमांची कठोर अंमलबजावणी करावी आणि नागरिकांच्या सुरक्षिततेसाठी ठोस उपाययोजना कराव्यात, अशी मागणी होत आहे.दरम्यान, या अपघाताची सविस्तर माहिती आणि पुढील कारवाईबाबत अधिकृत तपशील समोर येणे बाकी आहे.
