छत्रपती संभाजीनगर : नवरात्रोत्सवादरम्यान दांडिया खेळताना झालेल्या किरकोळ वादातून एका २० वर्षीय तरुणाची हत्या करण्यात आल्याची धक्कादायक घटना छत्रपती संभाजीनगरमधील मुकुंदवाडी परिसरातील संघर्षनगर येथे घडली. आठ वर्षांपासून एकमेकांचे जिवलग मित्र असलेल्या दोघांमधील मैत्रीचा शेवट रक्तरंजित झाला. नशेत असलेल्या मित्रानेच लोखंडी रॉडने हल्ला करून तरुणाचा जीव घेतल्याची माहिती समोर आली आहे. पुष्कर सतीष गाडे असे मृत तरुणाचे नाव असून, महेश पवार उर्फ भोऱ्या असे आरोपीचे नाव आहे. रविवारी रात्री ही घटना घडली.
मिळालेल्या माहितीनुसार, पुष्कर गाडे हा आपल्या आई-वडील आणि बहिणीसोबत संघर्षनगर परिसरात राहत होता. त्याचे वडील टेम्पोचालक आहेत. पुष्करने महिनाभरापूर्वीच एका कपड्याच्या दुकानात नोकरी सुरू केली होती. तर महेश पवार हा मजुरीचे काम करत होता. दोघांची गेल्या आठ वर्षांपासून घनिष्ठ मैत्री होती. मात्र, दांडिया खेळताना झालेल्या वादामुळे या मैत्रीचे रूपांतर दुर्दैवी घटनेत झाले.
रविवारी रात्री दांडिया खेळत असताना दोघांमध्ये किरकोळ कारणावरून वाद झाला. यावेळी नशेत असलेल्या महेशने लोखंडी रॉडने पुष्करच्या डोक्यावर, चेहऱ्यावर आणि मानेवर वार केले. या हल्ल्यात गंभीर जखमी झालेल्या पुष्करचा मृत्यू झाला. या घटनेमुळे संघर्षनगर परिसरात खळबळ उडाली असून, परिसरातून हळहळ व्यक्त केली जात आहे.
या प्रकरणी मुकुंदवाडी पोलीस ठाण्यात हत्येसह ॲट्रॉसिटी कायद्यांतर्गत गुन्हा दाखल करण्यात आला आहे. पोलिसांनी आरोपी महेश पवार याला ताब्यात घेतले असून, न्यायालयाने त्याला २३ ऑक्टोबरपर्यंत पोलीस कोठडी सुनावली आहे. या घटनेचा पुढील तपास मुकुंदवाडी पोलीस करत आहेत.
