मुंबई : महाराष्ट्रातील न्यायव्यवस्थेत सोमवारी एकच खळबळ उडवणारी घटना समोर आली आहे. राज्यातील पुण्यासह विविध जिल्ह्यांमधील न्यायालयांना बॉम्बने उडवून देण्याची धमकी देणारे ई-मेल एकाच वेळी प्राप्त झाले आहेत. या धमकीनंतर पोलीस प्रशासन आणि सुरक्षा यंत्रणा तातडीने सतर्क झाल्या असून खबरदारीचा उपाय म्हणून अनेक न्यायालयांमधील कामकाज थांबवून संपूर्ण परिसर रिकामा करण्यात आला आहे.

पुण्यातील शिवाजीनगर जिल्हा व सत्र न्यायालयासह मुंबई, ठाणे, सांगली, सोलापूर, बीड, परभणी, हिंगोली, नाशिक, सातारा, रत्नागिरी, अहिल्यानगर आणि अमरावती यांसह राज्यातील अनेक जिल्ह्यांमधील न्यायालयांना धमकीचा ई-मेल मिळाल्याची प्राथमिक माहिती समोर आली आहे. एकाच वेळी इतक्या मोठ्या संख्येने न्यायालयांना धमकी मिळाल्याने प्रशासनाची धावपळ उडाली आहे.

शिवाजीनगर न्यायालयातील कामकाज थांबवले

पुण्यातील शिवाजीनगर न्यायालयाला धमकीचा ई-मेल मिळताच पोलिसांनी तातडीने सुरक्षा व्यवस्था कडक केली. न्यायालयात उपस्थित असलेले न्यायाधीश, वकील, कर्मचारी आणि कामानिमित्त आलेल्या नागरिकांना सुरक्षितपणे बाहेर काढण्यात आले. खबरदारी म्हणून न्यायालयाचे कामकाज तात्पुरते बंद ठेवण्यात आले असून परिसरात पोलिसांचा मोठा बंदोबस्त तैनात करण्यात आला आहे.

बॉम्ब शोधक पथकाकडून तपासणी

घटनेचे गांभीर्य लक्षात घेऊन बॉम्ब शोधक व नाशक पथक (BDDS), श्वान पथक आणि स्थानिक पोलिसांनी न्यायालय परिसराची तपासणी सुरू केली आहे. न्यायालयातील विविध कक्ष, कार्यालये, पार्किंग परिसर आणि सार्वजनिक ठिकाणांची कसून झाडाझडती घेतली जात आहे. संशयास्पद वस्तू आढळते का, याची विशेष खबरदारी घेतली जात आहे.

राज्यातील अनेक जिल्ह्यांमध्ये सुरक्षा वाढवली

पुण्याप्रमाणेच मुंबईतील दिंडोशी, ठाणे, नाशिक, सांगली, सोलापूर, सातारा, बीड, परभणी, हिंगोली, रत्नागिरी आणि अमरावतीसह विविध ठिकाणी सुरक्षा यंत्रणा सक्रिय झाल्या आहेत. संबंधित न्यायालयांमध्येही खबरदारीच्या उपाययोजना करण्यात आल्या असून काही ठिकाणी परिसर रिकामा करून तपासणी सुरू करण्यात आली आहे.दरम्यान, प्राथमिक तपासणीत अद्याप कोणत्याही न्यायालय परिसरात स्फोटक वस्तू आढळल्याची माहिती समोर आलेली नाही.

धमकीचा ई-मेल पाठवणाऱ्याचा शोध सुरू

राज्यातील अनेक न्यायालयांना एकाच वेळी धमकीचे संदेश पाठवण्यामागे कोणाचा हात आहे, याचा तपास आता सायबर पोलिसांकडून सुरू करण्यात आला आहे. ई-मेलचा स्रोत, त्यासाठी वापरण्यात आलेली तांत्रिक यंत्रणा आणि पाठवणाऱ्याची ओळख शोधण्याचे प्रयत्न सुरू आहेत.

या धमकीमागे केवळ न्यायालयांचे कामकाज विस्कळीत करण्याचा उद्देश आहे की यामागे काही गंभीर कट आहे, याचाही तपास यंत्रणांकडून केला जात आहे.एकाच वेळी राज्यभरातील न्यायालयांना लक्ष्य करण्यात आल्याने सुरक्षा यंत्रणांसमोर मोठे आव्हान निर्माण झाले आहे. तपास पूर्ण होईपर्यंत न्यायालय परिसरात विशेष दक्षता घेण्यात येत असून नागरिकांनी अफवांवर विश्वास न ठेवता पोलिसांना सहकार्य करावे, असे आवाहन करण्यात येत आहे.