पुणे : राष्ट्रवादी काँग्रेस शरदचंद्र पवार पक्षाचे अध्यक्ष आणि ज्येष्ठ नेते शरद पवार यांना प्रकृती अस्वास्थ्यामुळे पुण्यातील रुबी हॉल क्लिनिकमध्ये दाखल करण्यात आले आहे. सततच्या दौऱ्यामुळे त्यांना थकवा जाणवत असून, नियमित तपासणीसह काही वैद्यकीय चाचण्या करण्यासाठी रुग्णालयात दाखल करण्यात आल्याची माहिती समोर आली आहे. त्यांच्या प्रकृतीच्या कारणास्तव मराठवाड्यातील नियोजित दुष्काळ पाहणी दौराही रद्द करण्यात आला आहे.

दोन दिवस रुग्णालयात विश्रांती घेणार

शरद पवार यांना पुढील दोन दिवस रुबी हॉल क्लिनिकमध्ये डॉक्टरांच्या देखरेखीखाली विश्रांती घेण्याचा सल्ला देण्यात आल्याची माहिती आहे. त्यांच्या विविध वैद्यकीय चाचण्या करण्यात येत असून, त्यांचे अहवाल आणि डॉक्टरांच्या सल्ल्यानंतर पुढील उपचारांबाबत निर्णय घेतला जाणार आहे.

खासदार सुप्रिया सुळे यांनीही याबाबत माहिती दिली आहे. बाबांना रुबी हॉल क्लिनिकमध्ये दाखल केले असून, काही वैद्यकीय चाचण्या सुरू आहेत. त्यांच्या प्रकृतीबाबत वेळोवेळी माहिती देत राहीन, असे त्यांनी सांगितले.

फुफ्फुसांमध्ये वेदना, नियमित तपासणीसाठी रुग्णालयात दाखल

रुबी हॉल क्लिनिकचे प्रमुख डॉ. परवेझ ग्रांट यांनी दिलेल्या माहितीनुसार, नियमित आरोग्य तपासणी आणि फुफ्फुसांमध्ये जाणवणाऱ्या वेदनांमुळे शरद पवार यांना रुग्णालयात दाखल करण्यात आले आहे. त्यांना कफ आणि अशक्तपणाचाही त्रास जाणवत असल्याची माहिती समोर आली आहे. त्यामुळे डॉक्टरांनी त्यांना रुग्णालयात दाखल होऊन विश्रांती घेण्याचा सल्ला दिला.

सोलापुरात शेतकऱ्यांशी संवाद; दुष्काळी परिस्थितीचा घेतला आढावा

शरद पवार गेल्या काही दिवसांपासून राज्यातील दुष्काळग्रस्त भागांच्या दौऱ्यावर होते. ३१ ऑक्टोबर आणि १ नोव्हेंबर रोजी त्यांनी सोलापूर जिल्ह्यातील माढा तालुक्यातील तुळशी गाव तसेच पंढरपूर तालुक्यातील दुधाळी गावाला भेट दिली होती.

या दौऱ्यादरम्यान त्यांनी दुष्काळी परिस्थितीची पाहणी केली. शेतकऱ्यांशी प्रत्यक्ष संवाद साधत त्यांच्या अडचणी आणि समस्या जाणून घेतल्या. शेतकऱ्यांच्या प्रश्नांकडे सरकारचे लक्ष वेधून घेण्याबरोबरच त्यांच्या समस्या सरकारदरबारी मांडण्याचे आश्वासनही त्यांनी दिले होते.

प्रकृतीमुळे दौऱ्यात बदल

शरद पवार यांचा सोलापूरनंतर धाराशिव, बीड आणि मराठवाड्यातील अन्य दुष्काळग्रस्त भागांचा दौरा नियोजित होता. मात्र, अचानक प्रकृती अस्वास्थ्य जाणवू लागल्याने त्यांना हा दौरा अर्धवट सोडून पुण्याकडे परतावे लागले.

सुरुवातीला प्रतिकूल हवामानामुळे दौरा रद्द झाल्याचे सांगण्यात आले होते. मात्र, त्यानंतर प्रकृतीच्या कारणास्तव दौऱ्यात बदल करण्यात आल्याचे स्पष्ट झाले. सध्या शरद पवार यांच्यावर रुबी हॉल क्लिनिकमध्ये वैद्यकीय तपासण्या सुरू असून, त्यांच्या प्रकृतीबाबत पुढील माहितीची प्रतीक्षा आहे.