आळंदी : पुणे जिल्ह्यातील आळंदी शहरात दिवसाढवळ्या तरुणावर धारदार कोयत्याने जीवघेणा हल्ला करण्यात आल्याची धक्कादायक घटना समोर आली आहे. गुरुवारी (१३ नोव्हेंबर) सकाळी साडेदहाच्या सुमारास आळंदी नगर परिषद हद्दीत घडलेल्या या प्रकारामुळे शहरात एकच खळबळ उडाली आहे. भरवस्तीत घडलेल्या या घटनेमुळे नागरिकांमध्ये भीतीचे वातावरण निर्माण झाले आहे.
मिळालेल्या प्राथमिक माहितीनुसार, सकाळच्या सुमारास परिसरात नागरिकांची वर्दळ असताना दोन हल्लेखोर हातात धारदार कोयते घेऊन एका तरुणाच्या मागे लागले. जीव वाचवण्यासाठी तरुणाने पळण्याचा प्रयत्न केला. मात्र, हल्लेखोरांनी त्याचा पाठलाग करत त्याला गाठले आणि त्याच्यावर धारदार शस्त्राने वार केले. अचानक घडलेल्या या हल्ल्यामुळे परिसरातील नागरिक, व्यावसायिक आणि भाविकांमध्ये घबराट पसरली.
हल्ल्याचा प्रकार सीसीटीव्हीमध्ये कैद
या घटनेदरम्यानचा थरार सीसीटीव्ही कॅमेऱ्यात कैद झाल्याची माहिती समोर आली आहे. दोन हल्लेखोर तरुणाचा पाठलाग करून त्याच्यावर वार करत असल्याचे दृश्य समोर आले आहे. या घटनेची चर्चा परिसरात सुरू असून नागरिकांकडून सुरक्षेबाबत चिंता व्यक्त केली जात आहे.
हल्ल्यामागचे कारण अद्याप अस्पष्ट
आळंदीसारख्या धार्मिक आणि वर्दळीच्या शहरात भरदिवसा घडलेल्या या घटनेने कायदा व सुव्यवस्थेचा प्रश्न पुन्हा ऐरणीवर आला आहे. हा हल्ला पूर्ववैमनस्यातून झाला की अन्य कोणत्या कारणामुळे, हे अद्याप स्पष्ट झालेले नाही. घटनेची माहिती मिळताच आळंदी पोलिसांनी घटनास्थळी धाव घेतली असून, प्रकरणाचा तपास सुरू केला आहे. हल्लेखोरांची ओळख आणि हल्ल्यामागील नेमके कारण शोधण्याचे काम पोलीस करत आहेत.
