पिंपरी-चिंचवड : हिंजवडी आयटी पार्क आणि आजूबाजूच्या परिसरातील वाढती वाहतूक कोंडी, अपुरी पायाभूत सुविधा, अपूर्ण रस्ते आणि नियोजनशून्य पार्किंग यासारख्या समस्यांवर अखेर राज्य सरकारने लक्ष घातले आहे. स्थानिक नागरिकांच्या व सामाजिक संस्थांच्या सातत्यपूर्ण पाठपुराव्यामुळे मुख्यमंत्री देवेंद्र फडणवीस यांच्या अध्यक्षतेखाली आज पार पडलेल्या बैठकीत अनेक ठोस निर्णय घेण्यात आले.

बैठकीत जाहीर झालेले महत्त्वाचे निर्णय:

मुख्यमंत्री देवेंद्र फडणवीस यांच्या अध्यक्षतेखाली पार पडलेल्या या महत्त्वपूर्ण बैठकीत हिंजवडी परिसरातील वाहतूक, पायाभूत सुविधा आणि नियोजनाच्या समस्या सोडवण्यासाठी एकूण दहा ठोस निर्णय जाहीर करण्यात आले. हे निर्णय पुढील प्रमाणे:

 सिंगल पॉइंट अथॉरिटीची स्थापना

हिंजवडी परिसरात विविध यंत्रणा (PMRDA, MIDC, PCMC, ग्रामपंचायत, पोलीस विभाग इत्यादी) कार्यरत आहेत. यांमध्ये समन्वयाचा अभाव असल्याने अनेक कामे रखडली आहेत. या पार्श्वभूमीवर एक ‘सिंगल पॉइंट अथॉरिटी’ स्थापन करून सर्व कामे एकाच खिडकीतून मार्गी लावण्याचा निर्णय घेण्यात आला आहे. यामुळे निर्णय प्रक्रिया गतीमान होईल आणि जबाबदारी निश्चित होईल.

 PMRDA कडे जमीन अधिग्रहणाची प्रमुख जबाबदारी

रस्ते, मेट्रो, पूल व इतर विकासकामांसाठी लागणाऱ्या जमिनीचे अधिग्रहण PMRDA कडून केले जाईल. या प्रक्रियेत वेळेचा अपव्यय टाळण्यासाठी जमिनीच्या मालकांसोबत थेट चर्चा करून सहमतीनुसार मार्ग काढण्यात येईल. मुख्यमंत्र्यांनी हे काम एका महिन्याच्या आत पूर्ण करण्याचे स्पष्ट आदेश दिले आहेत.

 लक्ष्मी चौक पूल ६ लेनमध्ये रूपांतर

सध्या लक्ष्मी चौक पूल अरुंद असल्यामुळे मोठ्या प्रमाणावर वाहतूक कोंडी होते. या पुलाचे रुंदीकरण करून ते ६ लेनचे करण्याचा निर्णय घेण्यात आला आहे. यामुळे पुणे-बंगलोर महामार्गावरील वाहतूक प्रवाह अधिक सुसाट आणि सुरळीत होईल.

 हिंजवडी-शिवाजीनगर मेट्रो डिसेंबर २०२५ पर्यंत पूर्ण करणे

मेट्रो प्रकल्पाची कामे काही ठिकाणी रखडलेली असून ट्रायल रन पूर्ण झाले आहेत. मुख्यमंत्री यांनी स्पष्ट निर्देश दिले की, लाइन ३ (हिंजवडी-शिवाजीनगर) ही मेट्रो डिसेंबर २०२५ पर्यंत कार्यान्वित झाली पाहिजे. हे प्रकल्प Pune IT City Metro Rail Ltd आणि MahaMetro यांच्या संयुक्त भागीदारीत पार पाडले जात आहेत.

MIDC कडून रस्ते रुंदीकरण आणि डागडुजी

हिंजवडी परिसरातील अंतर्गत आणि जोड रस्ते अनेक ठिकाणी खड्डेमय व अपूर्ण आहेत. याबाबत MIDC ला रस्ते रुंदीकरण, मजबुतीकरण आणि जलदगतीने डागडुजी करण्याचे आदेश देण्यात आले आहेत.

मेट्रो स्थानकांसाठी पार्किंग व्यवस्था

मेट्रो प्रवाशांना शेवटच्या मैलाचा (Last Mile Connectivity) त्रास होऊ नये म्हणून मेट्रो स्थानकाजवळ भक्कम पार्किंग सुविधा उभारली जाणार आहे. ही जबाबदारी Pune IT City Metro Rail Ltd (PPP – Tata-Siemens) कडे देण्यात आली आहे.

 TDR व जमीन अधिग्रहण प्रक्रिया एका महिन्यात पूर्ण करणे

विकासकामांसाठी लागणाऱ्या जमिनीच्या मोबदल्यात ट्रान्स्फरेबल डेव्हलपमेंट राईट्स (TDR) देण्यात येते. यासंदर्भात निर्णय प्रक्रिया सुस्पष्ट व जलद करण्यात येणार असून एका महिन्याच्या आत TDR वाटप आणि अधिग्रहण पूर्ण करण्याचे निर्देश देण्यात आले आहेत.

 वाहतूक व्यवस्थापनासाठी आधुनिक तंत्रज्ञानाचा वापर

वाहतूक नियंत्रणासाठी आधुनिक उपाययोजना हाती घेतल्या जाणार आहेत. स्मार्ट ट्रॅफिक सिग्नल्स, CCTV निगराणी, ट्रॅफिक सेंसर्स व अ‍ॅनालिटिक्स तंत्रज्ञान वापरून वाहतूक कोंडीवर उपाय केले जाणार आहेत.

पिंपरी-चिंचवड पोलीस विभागाला वाहतूक नियंत्रणाची जबाबदारी

हिंजवडी परिसरातील बेशिस्त ट्रॅफिकवर नियंत्रण ठेवण्यासाठी पिंपरी-चिंचवड पोलीस विभाग अधिक सक्रिय होणार आहे. पीक अवर्समध्ये पोलिसांची उपस्थिती वाढवून नियम तोडणाऱ्यांवर तात्काळ कारवाई केली जाईल.

 NHAI कडून तातडीने हायवे व अंडरपास प्रकल्प सुरू

राष्ट्रीय महामार्ग प्राधिकरणाकडे असलेल्या पुणवळे, ताथवडे, भुमकर चौक येथील अंडरपास प्रकल्प व इतर हायवे कामे तातडीने सुरू करण्याचे आदेश दिले गेले आहेत. या ठिकाणी होणारी वाहतूक कोंडी कमी करणे हे मुख्य उद्दिष्ट आहे.

अतिरिक्त निर्देश:

मुख्यमंत्री कार्यालयाच्या प्रधान सचिव अश्विनी भिडे यांनी PMRDA, MIDC आणि PCMC यांना जलनिचरा, ड्रेनेज व कचरा व्यवस्थापनावर विशेष भर देण्याचे आदेश दिले. ड्रेनेज अडथळे दूर करण्यासाठी जलद कारवाई व दोषींवर FIR दाखल करण्याचे निर्देश देण्यात आले.

 मुख्यमंत्र्यांच्या अध्यक्षतेखालील बैठकीत खालील प्रमुख संस्था व प्रतिनिधी उपस्थित होते:

• PMRDA (पुणे महानगर प्रदेश विकास प्राधिकरण)

• MIDC (महाराष्ट्र औद्योगिक विकास महामंडळ)

• PCMC (पिंपरी-चिंचवड महानगरपालिका)

• पुणे जिल्हा परिषद

• हिंजवडी ग्रामपंचायत

• Pune IT City Metro Rail Ltd (टाटा-सायमन्स PPP)

• MahaMetro प्राधिकरण

• NHAI (राष्ट्रीय महामार्ग प्राधिकरण)

• पिंपरी-चिंचवड पोलीस वाहतूक विभाग

• पिंपरी चिंचवड हाऊसिंग फेडरेशन

• बाणेर-बालेवाडी रेसिडेन्ट असोसिएशन

• UNCLOG हिंजवडी IT पार्क मोहिमेचे प्रतिनिधी

• फोरम ऑफ आयटी एम्प्लॉयीज(FITE)

• हिंजवडी एम्प्लॉयीज एंड रेसिडेंट ट्रस्ट (HEART)

• मुळशी को-ऑपरेटीव्ह हौसिंग सोसायटी फेडरेशनचे प्रतिनिधी

 हाऊसिंग फेडरेशनचा प्रतिसाद:

दत्तात्रय देशमुख (अध्यक्ष) व सुधीर देशमुख (सचिव) (पिंपरी चिंचवड हाऊसिंग फेडरेशन)–

“मुख्यमंत्री देवेंद्र फडणवीस यांनी घेतलेले हे पावले नागरिकांच्या दीर्घकाळच्या संघर्षाचे फलित आहे. हिंजवडी परिसराचा सर्वांगीण विकास करण्यासाठी आम्ही सर्व संबंधित संस्थांशी सातत्याने समन्वय ठेवत राहू.”या निर्णयांमुळे हिंजवडी IT पार्क परिसरात वाहतूक सुलभ होण्यासह सार्वजनिक सुविधा बळकट होणार आहेत. मेट्रो, रस्ते व ड्रेनेज व्यवस्थेच्या कामांना गती मिळणार असून डिसेंबर २०२५ हा काळ परिवर्तनाचा टप्पा ठरणार आहे.