मुंबई : मुंबईत मराठा आरक्षण आंदोलनाचा 5 वा दिवस असून, मराठा समाजाने OBC तून आरक्षण मिळावे अशी मागणी करत आहे. परंतु, OBC नेते छगन भुजबळ यांच्या नेतृत्वात एकवटले असून त्यांनी इशारा दिला की, मराठा आरक्षण OBC मध्ये दिले गेले तर आम्हीही मुंबई जाम करू शकतो. भुजबळ म्हणाले, मराठा समाज आर्थिक-सामाजिकदृष्ट्या मागास नाही; कुणबी व मराठा वेगळे असून OBC आरक्षण देणे शक्य नाही. सरकारने EWS आरक्षणाद्वारे 10% जागा दिल्या आहेत, ज्यात मराठा समाजाचा समावेश आहे.

ओबीसीतून मराठा आरक्षणाच्या मागणीसाठी मनोज जरांगे पाटील हैदराबाद गॅझेटचा आधार ते घेत आहेत, परंतु त्यात देखील मराठा आणि कुणबी वेगळे दाखवले आहेत. त्यावेळी, 1921 साली 2 लाख मराठा तिथ होते, तर 33 हजार कुणबी होते. देवेंद्र फडणवीस असोत की शरद पवार 50 टक्क्याच्या आत कोणीही आरक्षण देऊ शकत नाही. मराठा समाज आर्थिक, सामाजिक मागास नाही, तरीदेखील आरक्षणाची मागणी करत आहे. ईडब्ल्यूएस, एसईबीसी तसेच ओपन आणि ओबीसी अशा चार आरक्षणाचा फायदा घेत आहे, असे म्हणत छगन भुजबळ यांनी मराठा समाजाला ओबीसीतून आरक्षण देता येणार नसल्याचे स्पष्ट केले.  

आम्हाला मुंबई जाम करणे अवघड नाही

मुख्यमंत्री यांनी शब्द दिला आहे, ओबीसी आरक्षणाला धक्का लागणार नाही. मी कुणबी आणि मराठा वेगळे असल्याचे दाखले दिले आहेत. मुंबई जाम करणे आमच्यासाठी अवघड नाही, जर तुम्ही निर्णय घेतला तर आम्हाला देखील मुंबईला यावं लागेल, असे म्हणत छगन भुजबळ यांनीही ओबीसी आंदोलकांच्यावतीने मुंबई जाम करण्याचा इशारा दिलाय. उद्यापासून ओबीसीतून मराठा समाजाला आरक्षण नको ही भूमिका घेऊन राज्यभर आंदोलने केली जातील आणि निवेदन देखील दिल जाईल, असेही भुजबळ यांनी म्हटलं.