पिंपरी-चिंचवड : शिवसेना (उद्धव बाळासाहेब ठाकरे) गटाला पिंपरी-चिंचवड शहरात मोठा धक्का बसला असून, पक्षाचे शहराध्यक्ष संजोग वाघेरे यांनी आपल्या पदाचा राजीनामा दिला आहे. त्यांच्या या निर्णयानंतर राजकीय वर्तुळात मोठी खळबळ उडाली असून, लवकरच ते भारतीय जनता पक्षात प्रवेश करणार असल्याच्या चर्चा जोर धरू लागल्या आहेत.

विशेष म्हणजे, याआधी शरद पवार गटाचे नेते राहुल कलाटे यांच्या भाजप प्रवेशाच्या चर्चांनी शहराचे राजकारण तापले असतानाच आता संजोग वाघेरे यांचाही भाजपकडे ओढा वाढल्याने, पिंपरी-चिंचवडमध्ये भाजपने पुन्हा एकदा ‘ऑपरेशन लोटस’ सुरू केल्याची चर्चा रंगू लागली आहे.

महापालिका निवडणुकीच्या पार्श्वभूमीवर हालचाली

पिंपरी-चिंचवड महापालिकेच्या आगामी निवडणुका डोळ्यासमोर ठेवता भाजपने संघटन मजबूत करण्यासाठी विरोधी पक्षांतील प्रभावी नेत्यांना आपल्याकडे वळवण्याची रणनीती आखल्याचे बोलले जात आहे. संजोग वाघेरे हे शिवसेना (उबाठा) गटातील संयमी व संघटनात्मक कामासाठी ओळखले जाणारे नेते मानले जातात. त्यांच्या राजीनाम्यामुळे उबाठा गटाच्या स्थानिक संघटनेला मोठा धक्का बसल्याचे चित्र आहे. यापूर्वी त्यांनी अजित पवार गटामधून शिवसेना उबाठा गटामध्ये प्रवेश केला होता.

नाराजी की रणनीती?

संजोग वाघेरे यांच्या राजीनाम्यामागे पक्षातील अंतर्गत नाराजी, स्थानिक पातळीवरील नेतृत्वाला मिळणारा अपुरा पाठिंबा आणि भविष्यातील राजकीय वाटचालीसाठी सुरक्षित व्यासपीठ शोधण्याची भूमिका असल्याची चर्चा आहे. मात्र, त्यांनी अद्याप अधिकृतपणे भाजप प्रवेशाबाबत कोणतीही घोषणा केलेली नाही.

शिवसेना (उबाठा) गटात अस्वस्थता

वाघेरे यांच्या निर्णयामुळे शिवसेना (उबाठा) गटात अस्वस्थता पसरली असून, शहरातील कार्यकर्त्यांमध्ये संभ्रमाचे वातावरण आहे. काही नेत्यांनी हा निर्णय वैयक्तिक असल्याचे सांगत नुकसान नियंत्रणाचा प्रयत्न केला असला, तरी एकापाठोपाठ एक नेते पक्ष सोडत असल्याने नेतृत्वावर प्रश्नचिन्ह उपस्थित होत आहे.

पुढील घडामोडींवर लक्ष

संजोग वाघेरे प्रत्यक्ष भाजपमध्ये कधी आणि कोणत्या नेत्यांच्या उपस्थितीत प्रवेश करतात, याकडे आता सर्वांचे लक्ष लागले आहे. राहुल कलाटे आणि संजोग वाघेरे यांच्या संभाव्य प्रवेशामुळे पिंपरी-चिंचवडचे राजकीय समीकरण पूर्णपणे बदलण्याची शक्यता नाकारता येत नाही.