खोपोली : रायगड जिल्ह्यातील खोपोली शहरात शुक्रवारी (26 डिसेंबर) सकाळी एक धक्कादायक घटना घडली. खोपोली नगरपालिकेच्या शिंदे गटाच्या नगरसेविका मानसी काळोखे यांचे पती आणि माजी नगरसेवक मंगेश काळोखे यांची अज्ञात हल्लेखोरांनी निर्घृण हत्या केली.
मिळालेल्या माहितीनुसार, सकाळी सुमारे 7 वाजता मंगेश काळोखे हे आपल्या मुलाला शाळेत सोडून घरी परतत असताना त्यांच्यावर हल्ला करण्यात आला. प्रत्यक्षदर्शींच्या म्हणण्यानुसार, हल्लेखोर काळ्या रंगाच्या वाहनातून आले होते. त्यांनी चेहऱ्यावर रुमाल बांधलेला असल्याने त्यांची ओळख पटू शकली नाही. हल्ल्यानंतर आरोपी घटनास्थळावरून फरार झाले.
घटनेची माहिती मिळताच खोपोली पोलीस घटनास्थळी दाखल झाले असून हल्लेखोरांचा शोध युद्धपातळीवर सुरू आहे. हत्या नेमकी कोणत्या कारणामुळे करण्यात आली, याबाबत अद्याप स्पष्टता नसून पोलीस सर्व शक्यता तपासत आहेत.
ऐन निवडणुकांच्या पार्श्वभूमीवर दिवसाढवळ्या झालेल्या या हत्येमुळे खोपोली शहरात भीतीचे वातावरण निर्माण झाले आहे. या घटनेचे पडसाद राज्याच्या राजकीय वर्तुळातही उमटले असून प्रकरणाचा अधिक तपास सुरू आहे.हल्लेखोरांना अटक झाल्यानंतरच या हत्येमागील नेमके कारण स्पष्ट होईल, अशी माहिती पोलिसांनी दिली आहे.
