मुंबई : मुंबई महानगरपालिकेच्या 2026 च्या निवडणुकीसाठी राजकीय वातावरण तापू लागले असून ठाकरे बंधूंच्या युतीतून राज ठाकरे यांनी पहिला मोहरा पुढे केल्याची माहिती समोर आली आहे. दादर परिसरातील मुंबई महापालिका वॉर्ड क्रमांक 192 हा युतीच्या जागावाटपात मनसेला देण्यात आला असून, या वॉर्डमधून मनसे नेते यशवंत किल्लेदार निवडणूक लढवणार असल्याची माहिती सूत्रांनी दिली आहे.
यामुळे मुंबई महानगरपालिकेच्या निवडणुकीसाठी राज ठाकरेंचा पहिला उमेदवार निश्चित झाल्याची चर्चा राजकीय वर्तुळात सुरू झाली आहे. विशेष म्हणजे 2017 च्या निवडणुकीत याच वॉर्डमधून ठाकरे गटाच्या प्रिती पाटणकर विजयी झाल्या होत्या.
वॉर्ड 192 वरून ठाकरे गटात नाराजी
वॉर्ड क्रमांक 192 मनसेकडे दिल्यामुळे ठाकरे गटात नाराजीचे सूर उमटू लागले आहेत. युतीतील तडजोडीनुसार वॉर्ड 192 मनसेला तर वॉर्ड 194 ठाकरे गटाला देण्यात आल्याची माहिती आहे.
मात्र वॉर्ड 192 आपल्यालाच मिळावा, यासाठी ठाकरे गटातील स्थानिक पदाधिकारी आणि कार्यकर्ते आक्रमक झाले असून माजी नगरसेवक प्रकाश पाटणकर यांच्यासह शिवसैनिक आज दुपारी मातोश्रीवर उद्धव ठाकरे यांची भेट घेणार आहेत.
मुंबई महापालिका निवडणूक 2026 – महत्त्वाची माहिती
आशियातील सर्वात श्रीमंत महानगरपालिका म्हणून ओळख असलेल्या बृहन्मुंबई महानगरपालिकेची निवडणूक जाहीर झाली आहे.
मुंबईसह राज्यातील सर्व महापालिकांमध्ये 15 जानेवारी 2026 रोजी मतदान, तर 16 जानेवारी 2026 रोजी मतमोजणी होणार आहे.
एकूण प्रभाग : 227
मुंबई महापालिकेचा कार्यकाळ संपला : 7 मार्च 2022
सध्या प्रशासन प्रशासकांकडे
मागील निवडणूक : 2017
त्या वेळी महापौर : किशोरी पेडणेकर (शिवसेना)
मुंबई महापालिका निवडणूक कार्यक्रम 2026
नामनिर्देशन : 23 ते 30 डिसेंबर
छाननी : 31 डिसेंबर
उमेदवारी मागे घेणे : 2 जानेवारी 2026
अंतिम यादी व चिन्ह वाटप : 3 जानेवारी 2026
मतदान : 15 जानेवारी 2026
निकाल : 16 जानेवारी 2026
2017 चा पक्षीय बलाबल (227 नगरसेवक)
शिवसेना – 84
भाजप – 82
काँग्रेस – 31
राष्ट्रवादी काँग्रेस – 9
मनसे – 7
समाजवादी पक्ष – 6
एमआयएम – 2
अपक्ष – 5
