मुंबई : राज्यात महापालिका निवडणुकांची रणधुमाळी जोरात सुरू असताना राष्ट्रवादी काँग्रेसच्या राजकारणात मोठी हालचाल पाहायला मिळत आहे. उपमुख्यमंत्री व राष्ट्रवादीचे प्रमुख अजित पवार यांनी “राजकारणात कोणीही कोणाचा कायमचा शत्रू किंवा कायमचा मित्र नसतो,” असे सूचक विधान केल्यानंतर आजपासून आमदार रोहित पवार हे अजित पवारांसोबत थेट प्रचारात उतरले आहेत.
पिंपरी-चिंचवड महानगरपालिकेच्या निवडणूक प्रचारात रोहित पवार आजपासून सक्रिय सहभाग घेत असून, यामुळे दोन राष्ट्रवादींच्या एकत्रित प्रचाराला प्रत्यक्ष सुरुवात झाल्याचे मानले जात आहे. पुणे व पिंपरी-चिंचवड महापालिका निवडणुकीत दोन्ही राष्ट्रवादी एकत्र असल्या तरी आतापर्यंत प्रमुख नेते एकत्र प्रचारात दिसले नव्हते. त्यामुळे सुप्रिया सुळे आणि रोहित पवार कधी मैदानात उतरतात, याकडे राजकीय वर्तुळाचे लक्ष लागले होते.
‘तुतारी’सोबत ‘घड्याळा’चाही प्रचार
अजित पवार यांनी लवकरच सुप्रिया सुळे, रोहित पवार आणि निलेश लंके हे पुणे व पिंपरी-चिंचवड महापालिका प्रचारात एकत्र दिसतील, असे संकेत दिले आहेत. त्यानुसार, रोहित पवार आजपासून ‘तुतारी वाजवणारा माणूस’ या चिन्हासोबतच ‘घड्याळ’ या चिन्हाचा देखील प्रचार करताना दिसणार आहेत.
भाजपवर संयुक्त हल्लाबोल?
गेल्या काही दिवसांपासून अजित पवार पुणे आणि पिंपरी-चिंचवडमधील भाजप नेतृत्वावर आक्रमक टीका करत आहेत. त्यामुळे आज अजित पवारांसोबत रोहित पवार देखील भाजपवर हल्लाबोल करणार का, याकडे सर्वांचे लक्ष लागले आहे. या संयुक्त प्रचारातून राष्ट्रवादीची ताकद वाढते की अंतर्गत राजकारणाचे नवे संकेत मिळतात, हे पाहणे औत्सुक्याचे ठरणार आहे.
दोन राष्ट्रवादींच्या विलिनीकरणावर अजित पवारांची भूमिका
दोन राष्ट्रवादी काँग्रेस एकत्र येणार का, या प्रश्नावर अजित पवार म्हणाले, “दोन्ही राष्ट्रवादींनी एकत्र यायचे की नाही, यावर मी अजून विचार केलेला नाही. सध्या निवडणुकांची धामधूम सुरू असून उमेदवार निवड, प्रचार यामध्येच वेळ जात आहे. मात्र, दोन्ही पक्षांचे खालचे कार्यकर्ते यामुळे समाधानी असल्याचे दिसत आहे. राजकीय जीवनात कोणीही कोणाचा कायमचा शत्रू किंवा मित्र नसतो, एवढंच सांगतो. यावरून काय ओळखायचं ते ओळखा.”या सूचक वक्तव्यामुळे येत्या काळात राष्ट्रवादीच्या राजकारणात आणखी मोठे बदल घडण्याची शक्यता व्यक्त केली जात आहे.
