पिंपरी चिंचवड: आयटी नगरी म्हणून ओळखल्या जाणाऱ्या पिंपरी चिंचवड शहरात महापालिका निवडणुकीच्या मतदानादरम्यान मतदारांचा अपेक्षेपेक्षा कमी प्रतिसाद पाहायला मिळत आहे. दुपारी १:३० वाजेपर्यंत केवळ २८.१५ टक्के मतदान झाल्याची अधिकृत नोंद असून, शहरातील अनेक प्रभागांमध्ये मतदान केंद्रांवर शुकशुकाट दिसून आला.

आयटी कर्मचाऱ्यांची अडचण ठळक

शहरातील वाकड, हिंजवडी, ताथवडे, पिंपळे सौदागर आदी आयटीबहुल भागांमध्ये अनेक आयटी कर्मचाऱ्यांची कार्यालये सुरूच असल्यामुळे त्यांना मतदानासाठी बाहेर पडता आले नसल्याच्या तक्रारी समोर आल्या आहेत. काही कंपन्यांनी ‘वर्क फ्रॉम ऑफिस’ धोरण कायम ठेवल्याने कर्मचाऱ्यांना वेळेअभावी मतदान केंद्रांपर्यंत पोहोचणे कठीण झाले आहे. परिणामी, उच्चशिक्षित व तरुण मतदारवर्ग मतदान प्रक्रियेपासून दूर राहणार असल्याचे चित्र दिसते.

मतदारांमध्ये निरुत्साह

याशिवाय, काही ठिकाणी मतदारांमध्ये निरुत्साह आणि राजकीय उदासीनता जाणवत आहे. “कोणताही ठोस बदल जाणवत नाही,” “विकासाच्या घोषणा ऐकून कंटाळा आला आहे,” अशा प्रतिक्रिया काही मतदारांकडून व्यक्त होत आहेत. स्थानिक प्रश्न, पायाभूत सुविधा, वाहतूक कोंडी, पाणीपुरवठा आणि कचरा व्यवस्थापन यांसारख्या मुद्द्यांवर अपेक्षित स्पष्टता न मिळाल्याने मतदारांचा उत्साह कमी झाल्याचे जाणकारांचे मत आहे.

२०१७ च्या तुलनेत घसरणीची चिन्हे

२०१७ साली एकूण ६७% मतदान पूर्ण शहरात नोंदवले गेले होते. २०१७ च्या महापालिका निवडणुकीच्या तुलनेत यंदा मतदानाचा टक्का कमी राहण्याची स्पष्ट चिन्हे दिसत आहेत. दुपारनंतर मतदानात काहीशी वाढ होण्याची शक्यता असली, तरी एकूण सरासरी वाढवण्यासाठी ती पुरेशी ठरेल का, याबाबत साशंकता व्यक्त केली जात आहे.

कमी मतदानाचा फायदा कोणाला?

कमी मतदानाचा फायदा सत्ताधारी की विरोधक, हा प्रश्न आता चर्चेचा केंद्रबिंदू ठरणार आहे. पारंपरिक मतदारांवर अवलंबून असलेले पक्ष, संघटनात्मक ताकद असलेले उमेदवार आणि ‘कोर वोट बँक’ असलेल्या गटांना कमी मतदानाचा लाभ होऊ शकतो, असे राजकीय विश्लेषकांचे म्हणणे आहे. तर तरुण, मध्यमवर्गीय आणि आयटी मतदारांचा कमी सहभाग काही उमेदवारांसाठी आव्हान ठरू शकतो.

प्रशासनाकडून आवाहन

दरम्यान, निवडणूक प्रशासनाने मतदारांना उर्वरित वेळेत मतदानाचा हक्क बजावण्याचे आवाहन केले आहे. मतदान केंद्रांवर आवश्यक सुविधा उपलब्ध असल्याचे सांगत, दुपारनंतर आणि सायंकाळी मतदान वाढेल, अशी अपेक्षा व्यक्त करण्यात येत आहे.एकंदरीत, आयटी नगरीत आजचा कमी मतदानाचा कल राजकीय समीकरणे बदलणारा ठरतो का, याकडे सर्वांचे लक्ष लागले आहे. अंतिम मतदान टक्केवारी आणि त्याचे परिणाम येत्या निकालातून स्पष्ट होतील.