दिल्ली :  राजधानी दिल्लीतील उत्तर-पूर्व भागातील भजनपुरा परिसरात 6 वर्षांच्या निष्पाप मुलीवर अत्याचार झाल्याची धक्कादायक घटना समोर आली आहे. या प्रकरणी 13, 14 आणि 15 वर्षांच्या तीन अल्पवयीन मुलांना पोलिसांनी ताब्यात घेतले असून, त्यांच्याविरोधात कायदेशीर कारवाई सुरू आहे. या घटनेमुळे संपूर्ण दिल्ली हादरून गेली आहे.

पोलिसांनी दिलेल्या माहितीनुसार, ही घटना 18 जानेवारी रोजी घडली. पीडितेच्या कुटुंबीयांनी तक्रार दाखल करताच पोलिसांनी तातडीने गुन्हा नोंदवला. आरोपी हे दिल्लीबाहेरील रहिवासी असून, भजनपुरा परिसरातील एका फॅक्टरीत काम करत असल्याची माहिती समोर आली आहे.

आमिष दाखवून फसवणूक

तपासात समोर आलेल्या माहितीनुसार, आरोपींनी लहान मुलीला खाण्याचे आमिष दाखवून आपल्या सोबत नेले. त्यानंतर एका इमारतीत नेऊन तिच्यावर अत्याचार करण्यात आला. गंभीर अवस्थेत घरी परतल्यानंतर हा प्रकार उघडकीस आला. कुटुंबीयांनी तातडीने मुलीला रुग्णालयात दाखल केले असून, सध्या तिच्यावर उपचार सुरू आहेत.

24 जानेवारीला संतप्त निदर्शने

या घटनेची माहिती पसरताच 24 जानेवारी रोजी भजनपुरा परिसरात नागरिकांनी तीव्र संताप व्यक्त करत निदर्शने केली. दोषींवर कठोरात कठोर कारवाई करण्याची मागणी यावेळी करण्यात आली. कायदा-सुव्यवस्था अबाधित ठेवण्यासाठी परिसरात मोठा पोलीस बंदोबस्त तैनात करण्यात आला होता.पोलिसांनी संबंधित कलमांखाली गुन्हा दाखल करून तपास वेगाने सुरू केला असून, आरोपी अल्पवयीन असल्याने बाल न्याय कायद्यानुसार पुढील कारवाई केली जात आहे.

लहान मुलांच्या सुरक्षेचा प्रश्न ऐरणीवर

या घटनेमुळे पुन्हा एकदा राजधानीसह संपूर्ण देशात लहान मुलांच्या सुरक्षेचा गंभीर प्रश्न ऐरणीवर आला आहे. अशा घटनांना आळा घालण्यासाठी कठोर उपाययोजना आणि पालक-सामाजिक सजगतेची गरज असल्याचे मत व्यक्त केले जात आहे.