उरण : उरण तालुक्यातील खोपटे येथील गावाच्या वेशीवर असलेल्या रस्त्यामध्ये मोठमोठे दगड ठेऊन येथील पोलीस पाटील पदावर कार्यरत असलेल्या रंगानाथ पाटील यांनी रस्ता अडवल्याने या रस्त्यावरून ये - जा करणाऱ्या अनेक वाहनचालक व पादचाऱ्यांना त्याचा त्रास सहन करावा लागत आहे. येथील बांधपाडा ग्रामपंचायतीकडे ग्रामस्थांनी अनेकदा तक्रारी करूनही सदर रस्त्यावर आकसाने दगड ठेऊन रस्ता अडवल्याने संपूर्ण गावातील ग्रामस्थ व महिला संताप व्यक्त करीत आहेत.गावचे पोलीस पाटीलच गावचा रस्ता अडवीत असतील तर त्यांना पोलीस पाटील पदावर राहण्याचा अधिकारच उरत नसल्याचे येथील ग्रामस्थ म्हणत आहेत.तर रस्त्यातील दगड न काढल्यास येथील ग्रामस्थ या रस्ता अडवीणाऱ्या पोलीस पाटलाच्या विरोधात जनआंदोलन उभारण्याचा इशारा येथील ज्येष्ठ नागरिक विनायक पाटील यांनी ग्रामस्थांच्या वतीने दिला आहे.