बारामती : उपमुख्यमंत्री अजित पवार यांच्या अचानक झालेल्या अपघातापूर्वी काही क्षण आधी केलेल्या एका फोन कॉलचे रेकॉर्डिंग सध्या सोशल मीडियावर मोठ्या प्रमाणात व्हायरल होत आहे. या ऑडिओ क्लिपमध्ये त्यांनी पुरंदरचे सहकार नेते डॉ. दिगंबर दुर्गाडे यांचा उल्लेख केला आहे. या कॉलमुळे राजकीय वर्तुळात चर्चा सुरू झाल्यानंतर स्वतः दुर्गाडे यांनी माध्यमांसमोर आपली भूमिका स्पष्ट केली आहे.
दिगंबर दुर्गाडे कोण आहेत?
डॉ. दिगंबर दुर्गाडे हे सध्या पुणे जिल्हा मध्यवर्ती सहकारी बँकेचे अध्यक्ष आहेत. ते पुरंदर तालुक्यातील वाल्हे गावचे रहिवासी असून सहकार क्षेत्रात गेली अनेक वर्षे कार्यरत आहेत. जिल्हा पातळीवर त्यांची ओळख प्रभावी सहकार नेते अशी आहे.
व्हायरल कॉलवर दुर्गाडे काय म्हणाले?
व्हायरल झालेल्या कॉलबाबत बोलताना दुर्गाडे म्हणाले की, “हा उल्लेख स्थानिक स्वराज्य संस्थांच्या तिकीट वाटपाच्या चर्चेशी संबंधित असावा. अजितदादा नेहमीच जाती-धर्माच्या पलीकडे जाऊन राजकारण करत आले आहेत. या कॉलमधूनही तोच संदेश दिसतो.”ते पुढे म्हणाले, “माझ्यासारख्या सामान्य कार्यकर्त्याला जिल्हा बँकेत संधी देणारे अजितदादा होते. माझं पहिलं तिकीट त्यांनीच दिलं, आणि शेवटच्या काळात माझ्या मुलीलाही त्यांनी उमेदवारी दिली. हीच त्यांची खरी ओळख आहे — कार्यकर्त्यांना बळ देणारा नेता.”
ऑडिओ कॉलमध्ये अजित पवार नेमकं काय बोलले?
व्हायरल ऑडिओमध्ये अजित पवार यांनी दिगंबर दुर्गाडे यांचा उल्लेख करताना सांगितले की, माळी समाजातील एका कार्यकर्त्याला जिल्हा बँकेचे अध्यक्षपद दिले गेले आहे आणि राष्ट्रवादी काँग्रेस सर्व जाती-धर्मांना समान संधी देत आली आहे.तसेच, जिल्हा परिषद निवडणुकीत काही ठिकाणी माळी समाजाला उमेदवारी न मिळाल्याबाबत चर्चा झाली होती, त्यावर अजित पवार यांनी सर्व समाजांना न्याय देण्याची भूमिका घेतल्याचे या कॉलमधून स्पष्ट होते.
राजकीय अर्थ काय?
राजकीय विश्लेषकांच्या मते, या ऑडिओमधून अजित पवार यांची सर्वसमावेशक राजकारणाची भूमिका पुन्हा अधोरेखित होते. त्यांच्या जाण्यानंतरही कार्यकर्त्यांनी एकत्र राहावे, हाच संदेश यातून दिला गेल्याचे मानले जात आहे.
