सोलापूर : शहरातील विजापूर नाका पोलीस ठाण्याच्या हद्दीत एका अल्पवयीन मुलीवर अत्याचार करून तिला बळजबरीने धर्मांतरित करत लग्न लावल्याचा गंभीर प्रकार उघडकीस आला आहे. या प्रकरणी वकिलासह पाच जणांविरोधात गुन्हा दाखल करण्यात आला असून पोलिसांनी आतापर्यंत तिघांना अटक केली आहे.
पोलिसांच्या माहितीनुसार, आरोपींपैकी एकाने पीडित मुलीचा माग काढून तिचे खासगी फोटो व व्हिडिओ मिळवले आणि त्याआधारे तिला धमकावले. त्यानंतर तिला वेगळ्या ठिकाणी नेऊन अत्याचार करण्यात आला. पुढे लग्नाचे आमिष दाखवून तिला शहर काझी कार्यालयात नेण्यात आले, जिथे धर्मांतराची प्रक्रिया पूर्ण केल्याचे दाखवून कागदपत्रांवर स्वाक्षऱ्या घेतल्याचा आरोप आहे.
यानंतर पीडितेला काही काळ कर्नाटकातील कलबुर्गी येथे ठेवण्यात आले, जिथे तिचा छळ करण्यात आल्याची तक्रार तिने पोलिसांकडे केली आहे. तक्रारीनंतर पोलिसांनी कारवाई करत तीन आरोपींना अटक केली असून उर्वरित दोघांचा शोध सुरू आहे.
