मुंबई : उपमुख्यमंत्री एकनाथ शिंदे यांच्यावर विडंबनात्मक गीत सादर केल्याच्या प्रकरणात कॉमेडियन कुणाल कामरा आणि शिवसेना नेत्या सुषमा अंधारे यांनी विधीमंडळाच्या हक्कभंग समितीसमोर हजेरी लावली. मात्र मूळ तक्रारदार भाजप नेते प्रवीण दरेकर अनुपस्थित राहिल्याने सुनावणी पुढे ढकलण्यात आली असून आता 10 मार्च रोजी पुढील कार्यवाही होणार आहे.हक्कभंग समितीचे अध्यक्ष प्रसाद लाड यांनी दिलेल्या माहितीनुसार, पुढील सुनावणीत तक्रारदार आणि आरोपित यांची समोरासमोर साक्ष नोंदवली जाणार आहे.

काय आहे प्रकरण?

‘ठाणे की रिक्षा, चेहरे पे दाढी’ या आशयाचे विडंबनात्मक गीत कामरा यांनी मुंबईतील एका स्टुडिओमध्ये सादर केले होते. त्यानंतर हेच गीत सोशल मीडियावर शेअर करत सुषमा अंधारे यांनीही गायले. या पार्श्वभूमीवर प्रवीण दरेकर यांनी दोघांविरोधात हक्कभंग प्रस्ताव दाखल केला होता.या प्रकरणामुळे कामरा सुमारे वर्षभरानंतर मुंबईत आले आणि समितीसमोर उपस्थित राहिले. यावेळी त्यांनी ‘The Constitution of India’ असा मजकूर असलेला टी-शर्ट परिधान केला होता.

कुणाल कामरा यांची प्रतिक्रिया

समितीसमोर हजेरीनंतर बोलताना कामरा म्हणाले की, ते संविधानाचा आदर करतात आणि पुढील सुनावणीसाठीही हजर राहतील. त्यांच्यावर लावण्यात आलेल्या आरोपांना ते योग्य वेळी उत्तर देतील, असे त्यांनी स्पष्ट केले.

सुषमा अंधारे यांचा आरोप

अंधारे यांनी सांगितले की, गीत सादर केल्यानंतर संबंधित स्टुडिओमध्ये तोडफोड झाल्याची घटना घडली. त्यांनी समितीकडे आरोपांची संपूर्ण माहिती मागितली असून, प्रथम तक्रारदाराची साक्ष नोंदवावी, त्यानंतर आपली बाजू ऐकावी, अशी मागणी त्यांनी केली.तसेच, ‘गद्दार’ हा शब्द चर्चेत ठेवण्यासाठीच हक्कभंग प्रस्ताव आणल्याचा आरोपही त्यांनी केला. पंतप्रधानांवर टीका करणाऱ्या इतर कवितांबाबत आक्षेप का घेतला गेला नाही, असा सवालही त्यांनी उपस्थित केला.

पुढील सुनावणी 10 मार्चला

अध्यक्ष प्रसाद लाड यांनी सांगितले की, कायदेशीर प्रक्रियेप्रमाणे तक्रारदार उपस्थित नसल्याने आज साक्ष नोंदवता आली नाही. 10 मार्च रोजी दोन्ही बाजूंची समोरासमोर साक्ष नोंदवली जाईल आणि त्यानंतर पुढील निर्णय घेतला जाईल.या प्रकरणाकडे राजकीय वर्तुळाचे लक्ष लागले असून, पुढील सुनावणीत काय घडते याकडे सर्वांचे लक्ष असेल.