मुंबई : राज्यातील महिलांसाठी दिलासादायक बातमी आहे. मुख्यमंत्री माझी लाडकी बहीण योजनेअंतर्गत जानेवारी महिन्याचा ₹1500 हप्ता लाभार्थी महिलांच्या बँक खात्यात जमा होण्यास सुरुवात झाली आहे. महिला व बाल विकास विभागाने 23 जानेवारीपासून रक्कम वर्ग करण्याची प्रक्रिया सुरू केल्याची माहिती दिली आहे. सोमवारी रात्रीपासून अनेक महिलांना रक्कम जमा झाल्याचे संदेश प्राप्त होत आहेत.

98 कोटींचा निधी वर्ग

जानेवारीचा हप्ता वितरित करण्यासाठी 18 फेब्रुवारी रोजी सामाजिक न्याय विभागाकडून महिला व बाल विकास विभागाला सुमारे 98 कोटी रुपयांचा निधी उपलब्ध करून देण्यात आला. निधी प्राप्त झाल्यानंतर हप्त्यांचे वितरण सुरू करण्यात आले आहे.

लाभार्थी संख्येत घट

डिसेंबर 2025 चा हप्ता जानेवारीच्या मध्यात सुमारे 1 कोटी 60 लाख महिलांच्या खात्यात जमा करण्यात आला होता. मात्र, ई-केवायसी प्रक्रिया सक्तीची केल्यानंतर लाभार्थी संख्येत घट झाल्याचे दिसून आले आहे.

योजनेची सुरुवात जुलै 2024 मध्ये झाली तेव्हा सुमारे 2 कोटी 46 लाख महिला नोंदणीकृत होत्या. शासनाने 31 डिसेंबरपर्यंत ई-केवायसी पूर्ण करण्याचे निर्देश दिल्यानंतर सुमारे 1 कोटी 90 लाख महिलांनी प्रक्रिया पूर्ण केली. त्यापैकी योग्य माहिती भरलेल्या 1 कोटी 60 लाख महिलांनाच डिसेंबरचा हप्ता देण्यात आला.

ई-केवायसी दुरुस्तीची शेवटची संधी

ई-केवायसी करताना चुकीचे पर्याय निवडलेल्या महिलांना 31 मार्च 2026 पर्यंत दुरुस्तीची संधी देण्यात आली आहे. संबंधित लाभार्थींनी वेळेत माहिती अद्ययावत करावी, असे आवाहन करण्यात आले आहे.

आतापर्यंत किती हप्ते?

जुलै 2024 पासून जानेवारी 2026 पर्यंत एकूण 19 हप्ते महिलांच्या खात्यात जमा झाले आहेत. दरमहा ₹1500 प्रमाणे ही आर्थिक मदत दिली जाते.दरम्यान, प्रधानमंत्री किसान सम्मान निधी योजना आणि नमो शेतकरी महासन्मान निधी योजना अंतर्गत लाभ घेणाऱ्या महिला शेतकऱ्यांना स्वतंत्रपणे दरमहा ₹500 इतकी मदत दिली जाते.लाभार्थी महिलांनी आपले बँक खाते आणि मोबाईल संदेश तपासून रक्कम जमा झाल्याची खात्री करावी, असे आवाहन प्रशासनाकडून करण्यात आले आहे.