पुणे : एका वृत्तवाहिनीवरील चर्चेनंतर काँग्रेसचे प्रवक्ते हनुमंत पवार आणि हिंदुत्ववादी कार्यकर्ते तुषार दामगुडे यांच्यातील वादाने गंभीर वळण घेतले आहे. या प्रकरणी पोलिसांनी गुन्हा दाखल केला असून तपास सुरू आहे.हनुमंत पवार यांनी माध्यमांशी बोलताना सांगितले की, चर्चेनंतर दामगुडे आणि त्यांच्या काही साथीदारांनी त्यांच्यावर हल्ला केला. तसेच पिस्तुलाचा धाक दाखवत जीवे मारण्याची धमकी दिल्याचा आरोपही त्यांनी केला. “मी शेतीत काम केलेला आणि गुरं राखलेला माणूस आहे. मी त्यादिवशी एक बुक्की दिली असती तर तो पुन्हा उठला नसता. मात्र मी काँग्रेसचा कार्यकर्ता आणि गांधीवादी विचारांचा अनुयायी असल्याने हिंसेचा मार्ग स्वीकारला नाही,” असे पवार यांनी म्हटले. त्यांनी सीसीटीव्ही फुटेज तपासण्याची मागणीही केली आहे.
दुसरीकडे, तुषार दामगुडे यांनी या घटनेबाबत कोणताही पश्चाताप नसल्याचे स्पष्ट केले. “जे घडले ते योग्यच होते. काही वेळा ठाम भूमिका घ्यावी लागते,” असे ते म्हणाले. त्यांच्या म्हणण्यानुसार, त्यांच्याकडे कायदेशीर परवान्यासह शस्त्र असून सुरक्षेच्या कारणास्तव ते बाळगले जाते. पोलिसांनी शस्त्र आणि परवाना ताब्यात घेतल्याची माहितीही त्यांनी दिली.दरम्यान, पोलिसांनी दोन्ही बाजूंच्या तक्रारींची नोंद घेतली असून घटनेचा अधिक तपास सुरू आहे. शहरातील राजकीय वातावरणात या घटनेमुळे चांगलीच खळबळ उडाली आहे.
