अमेरिका : पश्चिम आशियात सुरू असलेल्या तणावपूर्ण संघर्षाच्या पार्श्वभूमीवर अमेरिकेचे माजी राष्ट्राध्यक्ष डोनाल्ड ट्रम्प यांनी मोठा दावा केला आहे. G7 देशांच्या नेत्यांसोबत झालेल्या व्हिडिओ परिषदेत बोलताना त्यांनी इराणची स्थिती आता कमकुवत होत चालली असून तो शरणागतीच्या टप्प्याजवळ पोहोचल्यासारखा दिसत असल्याचे म्हटले.अमेरिकन माध्यमांतील वृत्तांनुसार, या युद्धाचा निकाल आता स्पष्ट होत असल्याचाही दावा ट्रम्प यांनी केला. मात्र या वक्तव्याबाबत व्हाईट हाऊस कडून अद्याप अधिकृत भूमिका मांडण्यात आलेली नाही.

G7 बैठकीत ट्रम्प यांची भूमिका

G7 देशांच्या नेत्यांसोबत झालेल्या ऑनलाइन चर्चेदरम्यान ट्रम्प म्हणाले की, जगासाठी धोका ठरणारा “कॅन्सरसारखा घटक” संपवण्यात यश आल्याचे त्यांना वाटते. या वेळी त्यांनी इराणविरोधात सुरू असलेल्या ‘ऑपरेशन एपिक फ्युरी’ या लष्करी कारवाईचाही उल्लेख केला.ट्रम्प यांच्या मते सध्या इराण  मध्ये स्पष्ट नेतृत्व दिसत नाही. त्यामुळे अधिकृतरीत्या शरणागती जाहीर करणारा नेता तिथे नाही, असेही त्यांनी नमूद केले.

इराणच्या नेतृत्वावर कठोर टीका

पश्चिम आशियातील या संघर्षाला जवळपास दोन आठवडे झाले असून दोन्ही बाजूंनी ड्रोन आणि क्षेपणास्त्र हल्ले सुरूच आहेत. या पार्श्वभूमीवर ट्रम्प यांनी इराणच्या नेतृत्वावर तीव्र टीका केली. त्यांनी काही नेत्यांना “वेडे गुन्हेगार” असे संबोधत अशा नेतृत्वाचा अंत होणे हे जगासाठी सन्मानाची बाब असल्याचेही वक्तव्य केले.

गुप्तचर संस्थेचा अहवाल वेगळे चित्र दाखवतो

दरम्यान, ट्रम्प यांच्या दाव्यांवर अमेरिकेच्या गुप्तचर यंत्रणेकडून वेगळेच चित्र समोर आले आहे. त्यांच्या अहवालानुसार इराणमधील सत्ताधारी व्यवस्था अजूनही स्थिर आहे आणि सरकार कोसळण्याची शक्यता सध्या दिसत नाही.28 फेब्रुवारी रोजी अयातुल्ला खामनें यांच्या निधनानंतरही देशात राजकीय एकजूट कायम असल्याचे या अहवालात नमूद करण्यात आले आहे. त्यामुळे इराणमध्ये सत्ताबदल तातडीने होण्याची शक्यता नसल्याचे गुप्तचर संस्थेचे मत आहे.दरम्यान, या अहवालाबाबतही व्हाइट हाऊसने अद्याप कोणतीही अधिकृत प्रतिक्रिया दिलेली नाही.