अमेरिका : अमेरिका आणि इराण यांच्यातील तणाव पुन्हा एकदा वाढताना दिसत आहे. अमेरिकेचे माजी राष्ट्राध्यक्ष डोनाल्ड ट्रम्प यांनी नुकतीच इराणविरोधात कठोर भूमिका घेतली असून, चर्चा निष्फळ ठरल्यास हल्ले करण्याची चेतावणी दिली आहे.सोमवारी ट्रम्प यांनी पाच दिवसांच्या शस्त्रसंधीची घोषणा करत इराणमधील वीज प्रकल्पांवर हल्ले थांबवण्याचा निर्णय जाहीर केला होता. मात्र, काही तासांतच त्यांनी आपली भूमिका बदलत, चर्चेत प्रगती न झाल्यास बॉम्बहल्ले करण्याचा इशारा दिला.
ट्रम्प यांनी इराणमध्ये सत्तांतर होण्याची शक्यता व्यक्त करत, तेथील नेतृत्वाबाबतही सूचक वक्तव्य केले. त्यांनी सांगितले की, ते एका अशा व्यक्तीशी संवाद साधत आहेत, ज्याला ते आदरणीय नेता मानतात, परंतु त्या व्यक्तीची ओळख स्पष्ट केली नाही.
दरम्यान, इराणने अमेरिकेसोबत थेट चर्चा सुरू असल्याचा ट्रम्प यांचा दावा फेटाळून लावला आहे. इराणच्या अधिकृत माध्यमांनी हे विधान ‘मानसिक दबाव टाकण्याचा प्रयत्न’ असल्याचे म्हटले आहे.इराणने चर्चेसाठी दोन प्रमुख अटी मांडल्या होत्या अमेरिकेने युद्धामुळे झालेल्या नुकसानीची भरपाई करावी आणि प्रथम आक्रमण केल्याची कबुली द्यावी. मात्र, अमेरिकेने या दोन्ही अटी नाकारल्याचे इराणकडून स्पष्ट करण्यात आले आहे.
इराणने कठोर भूमिका कायम ठेवत, आर्थिक निर्बंध हटवले नाहीत आणि अंतर्गत बाबींमध्ये हस्तक्षेप थांबवला नाही, तर संघर्ष सुरूच राहील, असा इशाराही दिला आहे. तसेच, इराणकडून नव्या क्षेपणास्त्र हल्ल्यांची माहिती समोर आल्याने परिस्थिती आणखी तणावपूर्ण बनली आहे.एकूणच, दोन्ही देशांतील वाढता संघर्ष जागतिक पातळीवर चिंतेचा विषय ठरत आहे.
