धाराशिव : धाराशिव जिल्ह्यातील उमरगा तालुक्यात एक हृदयद्रावक आणि संतापजनक घटना उघडकीस आली आहे. बेरडवाडी येथे एका व्यक्तीने स्वतःच्या पत्नी आणि अवघ्या ८ वर्षांच्या मुलीची निर्घृण हत्या केल्याने संपूर्ण परिसर हादरला आहे.
मिळालेल्या माहितीनुसार, अजित वासुदेव असे आरोपीचे नाव असून त्याने पत्नी लिंबाबाई आणि मुलगी मानसी यांच्यावर कुऱ्हाडीने वार करत त्यांचा जीव घेतला. या घटनेमुळे बाप-लेकीच्या नात्यावरच प्रश्नचिन्ह निर्माण झाले असून समाजात हळहळ व्यक्त होत आहे.
या दुहेरी हत्येनंतर आरोपी स्वतःहून मुरूम पोलीस ठाण्यात हजर झाला आणि गुन्ह्याची कबुली दिली. त्यानंतर पोलिसांनी तातडीने घटनास्थळी धाव घेत पंचनामा केला असून पुढील तपास सुरू आहे.दरम्यान, या घटनेमागील नेमके कारण अद्याप स्पष्ट झालेले नाही. कौटुंबिक वादातून ही घटना घडल्याची शक्यता वर्तवली जात असून पोलिस सर्व अंगांनी तपास करत आहेत.
