धुळे: धुळे शहराजवळील एका गावात अत्यंत धक्कादायक घटना घडली असून, गर्भपातासाठी घेतलेल्या गोळ्यांचे अतिसेवन केल्यामुळे १८ वर्षीय अविवाहित तरुणीचा मृत्यू झाला आहे. या प्रकरणी मोहाडी पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे.
मिळालेल्या माहितीनुसार, संबंधित तरुणीची प्रकृती अचानक बिघडल्याने तिला देवपूर परिसरातील एका खासगी रुग्णालयात दाखल करण्यात आले होते. वैद्यकीय तपासणीत ती सुमारे २४ आठवड्यांची (सहा महिने) गर्भवती असल्याचे समोर आले. गर्भपात करण्याच्या उद्देशाने तिने काही औषधांचे सेवन केल्याची माहिती डॉक्टरांनी कुटुंबीयांना दिली.
दरम्यान, औषधांचे प्रमाण अधिक झाल्याने तिचा रक्तदाब झपाट्याने खाली आला आणि तिला झटके येऊ लागले. प्रकृती गंभीर झाल्याने डॉक्टरांच्या सल्ल्यानुसार तिला तातडीने हिरे शासकीय रुग्णालयात हलवण्यात आले. तेथील अतिदक्षता विभागात उपचार सुरू असताना तिचा मृत्यू झाला.
घटनेची माहिती मिळताच मोहाडी पोलिसांनी रुग्णालयात भेट देत प्राथमिक नोंद केली. या प्रकरणात तरुणीला गर्भपाताच्या गोळ्या कोणी दिल्या, यामागे कोणाचा सहभाग आहे का, याचा तपास सध्या पोलिसांकडून केला जात आहे. या घटनेमुळे परिसरात खळबळ उडाली आहे.
