पिंपरी-चिंचवड : शहरातील कायदा व सुव्यवस्था अधिक मजबूत करण्याच्या उद्देशाने पोलिसांनी भाडेकरू पडताळणीची विशेष मोहीम राबवली असून, या कारवाईदरम्यान नियमांचे पालन न करणाऱ्या 38 घरमालकांवर गुन्हे दाखल करण्यात आले आहेत.
पिंपरी-चिंचवड पोलीस आयुक्तालयाच्या पथकांनी विविध भागांत तपास मोहीम राबवून भाडेकरूंची माहिती पडताळली. यावेळी अनेक घरमालकांनी आपल्या भाडेकरूंची माहिती संबंधित पोलिस ठाण्यात नोंदवलेली नसल्याचे आढळून आले. त्यामुळे अशा घरमालकांवर भारतीय न्याय संहिता (BNS) कलम 223 अंतर्गत कारवाई करण्यात आली.
या मोहिमेचा उद्देश शहरात बेकायदेशीररीत्या वास्तव्यास असलेल्या संशयित व्यक्तींवर लक्ष ठेवणे हा असून, विशेषतः खोट्या कागदपत्रांवर राहणाऱ्या आणि परप्रांतीय तसेच परदेशी नागरिकांची माहिती पडताळण्यावर भर देण्यात आला. पोलिसांनी काही ठिकाणी संशयास्पद हालचालींचीही नोंद घेत तपास सुरू ठेवला आहे.
पोलिस प्रशासनाने सर्व घरमालकांना स्पष्ट सूचना दिल्या आहेत की, भाडेकरू ठेवताना त्यांची संपूर्ण माहिती जवळच्या पोलिस ठाण्यात नोंदवणे बंधनकारक आहे. नियमांचे उल्लंघन केल्यास कठोर कारवाई केली जाईल, असा इशाराही देण्यात आला आहे.या कारवाईमुळे शहरात भाडेकरू नोंदणीबाबत जागरूकता वाढण्याची शक्यता असून, आगामी काळात अशा प्रकारच्या मोहिमा अधिक तीव्र केल्या जाणार असल्याचे पोलिसांनी स्पष्ट केले आहे.
