नवी दिल्ली : देशातील परीक्षा व्यवस्थेतील कथित गैरव्यवहार आणि विद्यार्थ्यांच्या प्रश्नांवर आवाज उठवणाऱ्या कॉकरोच जनता पार्टीला मोठा दिलासा मिळाला आहे. पक्षाने जंतरमंतर येथे आयोजित केलेल्या आंदोलनाला दिल्ली पोलिसांनी अधिकृत परवानगी दिली असून, पक्षाचे संस्थापक अभिजीत दिपके भारतात पोहोचताच ही महत्त्वाची घडामोड घडली आहे.

दिल्ली पोलिसांच्या परवानगीनुसार, 6 जून रोजी सकाळी 10 ते सायंकाळी 5 वाजेपर्यंत जंतरमंतर येथे आंदोलन करण्यात येणार आहे. परवानगी मिळाल्यानंतर अभिजीत दिपके यांनी सोशल मीडियावरून समर्थकांना आंदोलनात सहभागी होण्याचे आवाहन केले.

अमेरिकेतून दिल्लीत दाखल झालेल्या दिपके यांच्या स्वागतासाठी विमानतळावर समर्थकांची मोठी गर्दी झाली होती. यावेळी त्यांच्या हातात डॉ. बाबासाहेब आंबेडकर यांचे पुस्तक असल्याने त्याचीही चर्चा रंगली.

आंदोलनादरम्यान शांतता आणि कायदा-सुव्यवस्था राखण्याचे आवाहन करत दिपके यांनी समर्थकांना थेट जंतरमंतरवर पोहोचण्यास सांगितले. संसद मार्ग पोलीस ठाण्याबाहेर गर्दी न करण्याचेही त्यांनी स्पष्ट केले.

या आंदोलनाची प्रमुख मागणी म्हणजे केंद्रीय शिक्षणमंत्री धर्मेंद्र प्रधान यांच्या राजीनाम्याची आहे. विविध राष्ट्रीय परीक्षांमधील कथित त्रुटी आणि विद्यार्थ्यांच्या समस्यांवर सरकारने उत्तर द्यावे, अशी भूमिका कॉकरोच जनता पार्टीने घेतली आहे.

आंदोलनाच्या पार्श्वभूमीवर राजधानीत कडेकोट सुरक्षा व्यवस्था तैनात करण्यात आली आहे. जंतरमंतर आणि परिसरातील संवेदनशील भागांमध्ये मोठ्या प्रमाणात पोलीस व निमलष्करी दल तैनात करण्यात आले असून, प्रमुख मार्गांवर बॅरिकेडिंग आणि वाहन तपासणी सुरू आहे. त्यामुळे या आंदोलनाकडे देशभरातील विद्यार्थी आणि नागरिकांचे लक्ष लागले आहे.