पुणे : झाशीच्या राणी लक्ष्मीबाई यांच्या स्मृतिदिनानिमित्त बालगंधर्व येथील त्यांच्या पुतळ्यास पुष्पहार अर्पण करून विनम्र अभिवादन करण्यात आले. यावेळी सामाजिक कार्यकर्त्या मंजुषा नागपुरे यांनी उपस्थित राहून वीरांगना राणी लक्ष्मीबाई यांच्या शौर्य, स्वाभिमान आणि मातृभूमीप्रती असलेल्या अखंड निष्ठेचा गौरव केला.
कार्यक्रमादरम्यान मॉर्डन गर्ल्स हायस्कूलच्या विद्यार्थिनींनी ढोल-ताशांच्या गजरात राणी लक्ष्मीबाई यांना मानवंदना अर्पण केली. त्यांच्या शौर्य, त्याग आणि राष्ट्रभक्तीच्या प्रेरणेने संपूर्ण परिसर देशभक्तीच्या वातावरणाने भारावून गेला.
या प्रसंगी उपमहापौर परशुराम वाडेकर, नगरसेवक पुनीत जोशी, मॉर्डन गर्ल्स हायस्कूलचे शिक्षक व विद्यार्थी, ज्येष्ठ नागरिक संघाचे सदस्य, राष्ट्रसेविका समितीच्या स्वयंसेविका तसेच विविध सामाजिक संघटनांचे प्रतिनिधी मोठ्या संख्येने उपस्थित होते.यावेळी उपस्थितांनी झाशीच्या राणी लक्ष्मीबाई यांच्या पराक्रमाचे स्मरण करत त्यांच्या आदर्शांवर चालण्याचा संकल्प व्यक्त केला.
