मुंबई : राज्यातील राजकारणाला वेग आला असतानाच आज (19 जून) शिवसेनेचा 60 वा वर्धापन दिन दोन वेगवेगळ्या ठिकाणी साजरा होत आहे. एकीकडे मुख्यमंत्री एकनाथ शिंदे यांच्या नेतृत्वाखालील शिवसेनेचा मेळावा गोरेगाव येथील नेस्को सेंटरमध्ये होत आहे, तर दुसरीकडे उद्धव ठाकरे यांच्या शिवसेना (उद्धव बाळासाहेब ठाकरे) पक्षाचा कार्यक्रम सायन येथील षण्मुखानंद सभागृहात आयोजित करण्यात आला आहे.

या वर्धापन दिनाला विशेष महत्त्व प्राप्त झाले आहे. कारण, गुरुवारी दिल्लीत झालेल्या ठाकरे गटाच्या संसदीय दलाच्या बैठकीला पक्षाच्या सहा खासदारांनी अनुपस्थिती दर्शविल्यानंतर राजकीय वर्तुळात मोठी चर्चा रंगली आहे. हे खासदार शिंदे गटात प्रवेश करण्याच्या तयारीत असल्याचा दावा केला जात असून, त्यामुळे ठाकरे गटाला मोठा धक्का मानला जात आहे.

शिंदे गटाकडून या घडामोडींना ‘ऑपरेशन टायगर’चे यश मानले जात आहे. त्यामुळे आजच्या वर्धापन दिन मेळाव्यात मुख्यमंत्री एकनाथ शिंदे यांची भूमिका आणि भाषणाकडे सर्वांचे लक्ष लागले आहे. दुसरीकडे, पक्षातील बंडखोरीच्या पार्श्वभूमीवर उद्धव ठाकरे काय भूमिका मांडतात, याकडेही शिवसैनिकांसह राज्याचे लक्ष असेल.

गोरेगावमधील नेस्को सेंटर येथे होणाऱ्या शिंदे गटाच्या कार्यक्रमासाठी राज्यभरातून पदाधिकारी आणि कार्यकर्ते मुंबईत दाखल होत आहेत. मुंबई, ठाणे आणि परिसरात मोठ्या प्रमाणावर बॅनरबाजी करण्यात आली आहे. तर ठाकरे गटाकडूनही सायनमधील कार्यक्रमासाठी जोरदार तयारी करण्यात आली असून मोठ्या संख्येने शिवसैनिक उपस्थित राहण्याची शक्यता आहे.

दोन्ही गटांकडून वर्धापन दिनाच्या निमित्ताने शक्तिप्रदर्शनाची तयारी सुरू असल्याने आजचा दिवस शिवसेनेच्या राजकारणासाठी महत्त्वाचा मानला जात आहे. आगामी राजकीय समीकरणांवर या मेळाव्यांचा प्रभाव पडण्याची शक्यता व्यक्त केली जात आहे.

शिंदे गटात जाण्याची चर्चा असलेले खासदार

संजय जाधव (परभणी)

संजय देशमुख (यवतमाळ-वाशिम)

नागेश पाटील आष्टीकर (हिंगोली)

ओमराजे निंबाळकर (धाराशिव)

भाऊसाहेब वाकचौरे (शिर्डी)

संजय दीना पाटील (ईशान्य मुंबई)

उद्धव ठाकरेंसोबत असल्याचे मानले जाणारे खासदार

अरविंद सावंत (दक्षिण मुंबई)

अनिल देसाई (दक्षिण मध्य मुंबई)

राजाभाऊ वाजे (नाशिक)