पुणे: पुणे शहर वाहतूक शाखेतील पोलीस नाईक धनाजी भरत वणवे (वय 42) यांचे काल (बुधवारी, ता 10) सायंकाळी कर्तव्य बजावत असताना हृदयविकाराच्या तीव्र झटक्याने निधन झाले. ही दुर्दैवी घटना कात्रज मंडई चौकात बुधवारी सायंकाळी सुमारे 6.45 वाजता घडली. त्यांच्या निधनामुळे पुणे पोलिस दलात शोककळा पसरली आहे.

नेमकं काय घडलं?

पोलीस नाईक वणवे नेहमीप्रमाणे वाहतूक नियमनासाठी कात्रज मंडई चौकात तैनात होते. अचानक त्यांना चक्कर आली आणि ते कोसळले. तात्काळ उपस्थित सहकाऱ्यांनी त्यांना कात्रज येथील साईस्नेह रुग्णालयात दाखल केले. मात्र, उपाचारापूर्वीच त्यांचे तीव्र हृदयविकाराच्या झटक्याने आकस्मिक निधन झाल्याचे डॉक्टरांनी स्पष्ट केले. डॉक्टरांच्या प्राथमिक अहवालानुसार, हृदयविकाराचा तीव्र झटका आल्यामुळं पोलीस नाईक धनाजी भरत वणवे यांचा मृत्यू झाला.

धनाजी वणवे हे गेली अनेक वर्षे पुणे शहर वाहतूक शाखेत कार्यरत होते. त्यांनी पोलिस सेवेत अत्यंत जबाबदारीने, प्रामाणिकपणे आणि शिस्तप्रियतेने आपले कर्तव्य बजावले. ट्रॅफिक नियंत्रणासारख्या कठीण कामात देखील त्यांचा नेहमी सकारात्मक आणि शांत दृष्टिकोन असायचा. त्यामुळे सहकारी पोलिसांमध्ये ते लोकप्रिय होते.वणवे यांच्या निधनाने सहकारी पोलीस अधिकाऱ्यांमध्ये हळहळ व्यक्त करण्यात येत आहे. त्यांच्या पश्चात आई, वडील,पत्नी, मुलगी आणि मुलगा असा परिवार आहे.असेही त्यांनी नमूद केले.यासंदर्भात अध्यक्षांनी या घटनेची दखल घ्यावी, असेही मुख्यमंत्री श्री.फडणवीस यांनी नमूद केले.

पुणे पोलीस आयुक्त अमितेश कुमार, वाहतूक विभागाचे वरिष्ठ अधिकारी आणि अनेक सहकाऱ्यांनी वणवे यांच्या निधनाबद्दल तीव्र दुःख व्यक्त केले असून, त्यांना पोलीस दलातर्फे आदरांजली अर्पण करण्यात आली आहे. कर्तव्य बजावत असताना प्राण गमावणारे धनाजी वणवे हे खऱ्या अर्थाने समर्पित आणि शौर्यवान पोलीस अधिकारी होते, अशी भावना अनेकांनी व्यक्त केली.