मुंबई : मुंबईतील कुख्यात डॉन अरुण गवळी याला सर्वोच्च न्यायालयाने मोठा दिलासा दिला आहे.अंडरवर्ल्ड डॉन व माजी आमदार अरुण गवळी याला शिवसेना नगरसेवक कमलाकर जामसंडेकर यांच्या खूनप्रकरणी 18 वर्षांनंतर सुप्रीम कोर्टाने जामीन मंजूर केला आहे. २ मार्च २००७ रोजी घाटकोपर येथील निवासस्थानी जामसंडेकर यांची भरदिवसा गोळ्या झाडून हत्या झाली होती. या प्रकरणात मुंबई सत्र न्यायालयाने गवळी व इतर 11 जणांना जन्मठेप सुनावली होती, तर काहींना निर्दोष मुक्त केले होते. जामसंडेकर यांनी गवळीच्या अखिल भारतीय सेना उमेदवाराला निवडणुकीत पराभूत केले होते. सुप्रीम कोर्टाच्या निर्णयानंतर गवळीच्या सुटकेचा मार्ग मोकळा झाला आहे.

अरुण गवळीला या प्रकरणी जन्मठेपेची शिक्षा सुनावण्यात आली होती. तो मागील 17 वर्षांपासून कारागृहात शिक्षा भोगत होता. सध्या त्याचे वय 76 वर्षे असून, वय आणि अपील प्रलंबित असल्याचा विचार करून न्यायालयाने जामीन मंजूर केला. मात्र त्याच्या जन्मठेपेवरील अपील अजूनही न्यायालयात प्रलंबित आहे.

गवळी आणि त्याच्या टोळीवर खंडणी, अपहरण, धमक्या देणे आणि मालमत्ता बळकावणे यासारखे गंभीर आरोप आहेत. मुंबईतील लालबाग, परळ, भायखळा, करीरोड, दगडी चाळ, सातरस्ता, माजगाव या भागात त्याचा मोठा प्रभाव आहे.

सन 2004 मध्ये दक्षिण मध्य मुंबई लोकसभा निवडणुकीत गवळीने उमेदवारी दाखल केली होती. त्यावेळी त्याला तब्बल 92 हजार मते मिळाली होती, ज्यामुळे त्याचा राजकीय प्रभावही अधोरेखित झाला होता.

शिवसेना नगरसेवक कमलाकर जामसंडेकर यांच्या हत्येप्रकरणी कुख्यात गुंड अरूण गवळीला 2007 मध्ये अटक करण्यात आली होती. या प्रकरणात अरूण गवळीला जन्मठेपेची शिक्षा सुनावण्यात आली.

मुंबईतील शिवसेनेचे नगरसेवक कमलाकर जामसंडेकर यांचं त्यांच्या भागातील सदाशिव सुर्वे नावाच्या इसमासोबत प्रॉपर्टीवरुन वाद सुरु होता. त्यानंतर सदाशिवने गवळीच्या हस्तकांमार्फत त्यांची सुपारी दिली. प्रताप गोडसेला गवळीने या सुपारीची जबाबदारी दिली होती. याप्रकरणी आपलं नाव येऊ नये यासाठी नवे शूटर्स शोधण्यास सांगण्यात आलं होतं.

गोडसेने या कामासाठी श्रीकृष्ण गुरवमार्फत नरेंद्र गिरी आणि विजयकुमार गिरी यांची निवड केली. या दोघांना अडीच-अडीच लाख रुपये देण्याचं कबुल केलं आणि अॅडव्हान्स म्हणून 20-20 हजार रुपये दिले. विजयकुमार गिरीने अशोककुमार जयस्वालसोबत जवळपास 15 दिवस जामसंडेकरवर पाळत ठेवली. अखेरीस 2 मार्च 2007 रोजी संधी मिळताच जामसंडेकरच्या राहत्या घरी त्यांची गोळ्या झाडून हत्या करण्यात आली.