मुंबई: आशयप्रधान आणि सामाजिक विषयांना हात घालणाऱ्या मराठी चित्रपटांच्या यादीत आता ‘मर्दिनी’ या नव्या चित्रपटाची भर पडणार आहे. नुकतंच या चित्रपटाचं अधिकृत पोस्टर लॉन्च करण्यात आलं असून, त्यातून प्रेक्षकांसमोर एक प्रभावी आणि भावनिक कथा उलगडण्याची चाहूल लागली आहे. पोस्टरवरील “आई तारी तिला कोण मारी” हे कॅप्शन विशेष लक्ष वेधून घेत असून, आईच्या सामर्थ्यवान रूपाची झलक त्यातून दिसून येते.

श्रेयस तळपदे प्रस्तुत ‘मर्दिनी’ हा चित्रपट केवळ स्त्रीशक्तीवर आधारित नसून, एका आईच्या संघर्षमय प्रवासाभोवती फिरणारी कथा आहे. आपल्या लेकरांसाठी आई कितीही कठीण परिस्थितीला सामोरी जाते आणि वेळ पडल्यास ती कठोर रूप धारण करते, ही संकल्पना या चित्रपटातून मांडली जाणार आहे. त्यामुळे हा चित्रपट भावनिक आणि प्रेरणादायी ठरण्याची शक्यता आहे.

या चित्रपटात प्रार्थना बेहेरे, अभिजीत खांडकेकर, जितेंद्र जोशी आणि राजेश भोसले यांसारखे दमदार कलाकार प्रमुख भूमिकांमध्ये झळकणार आहेत. तसेच बालकलाकार मायरा वैकुळ हिची भूमिकाही कथेला वेगळं भावनिक वजन देणार आहे.

अजय मयेकर यांच्या दिग्दर्शनात तयार होत असलेला ‘मर्दिनी’ हा त्यांचा पहिलाच दिग्दर्शकीय चित्रपट आहे. दिप्ती तळपदे निर्मित या चित्रपटात टिना राकेश कोठारी सहनिर्माती म्हणून सहभागी आहेत. छायांकन शब्बीर नाईक, संकलन अभिषेक शेठ, संगीत हितेश मोडक आणि पटकथा-संवाद महाबळेश्वर नार्वेकर यांनी चित्रपटाच्या तांत्रिक बाजूची जबाबदारी सांभाळली आहे.पोस्टरमधून मिळालेल्या पहिल्या झलकमुळे ‘मर्दिनी’बद्दल चित्रपटवर्तुळात उत्सुकता वाढली असून, आईच्या प्रेम, संरक्षण आणि संघर्षाची ही कथा 3 जुलै 2026 रोजी प्रेक्षकांच्या भेटीस येणार आहे.