मुंबई / दिल्ली – इंडिगो एअरलाईन्सने 5 डिसेंबर 2025 रोजी दिल्ली (DEL) विमानतळावरून निघणारी सर्व देशांतर्गत विमान उड्डाणे रात्री 11.59 वाजेपर्यंत रद्द केल्याची अधिकृत घोषणा केली आहे. गेल्या तीन दिवसांपासून कर्मचाऱ्यांच्या कमतरतेमुळे इंडिगोची उड्डाणे सातत्याने विस्कळीत होत असून देशभरातील प्रवाशांना मोठ्या गैरसोयीचा सामना करावा लागत आहे.: इंडिगो एअरलाईनमुळे पुणे, मुंबई, कोलकाता आणि दिल्ली  विमानतळावरुन प्रवास करणाऱ्या विमान प्रवाशांची कालपासून मोठी गैरसोय झाल्याचं पाहायला मिळत असून इंडिगो विमानाचे बुकींग असलेल्या प्रवाशांना याचा मोठा फटका बसला आहे. कारण, पुणे आणि दिल्ली येथून इंडिगो  विमान कंपनीने तब्बल 200 उड्डाणे रद्द केली असून आता अधिकृत पत्र देखील जारी केले आहे. दिल्ली विमानतळ येथून 5 डिसेंबर 2025 रोजी निघणाऱ्या इंडिगोचे सर्व देशांतर्गत उड्डाणे रात्री 11:59 वाजेपर्यंत रद्द करण्यात आल्याची माहिती इंडिगोकडून अधिकारिकरित्या देण्यात आली आहे. या पत्रात प्रवाशांना झालेल्या मनस्थापाबद्दल इंडिगोकडून माफीनामा देखील सादर करण्यात आला आहे. 

दिल्ली विमानतळावरून 5 डिसेंबर 2025 रोजी (DEL) निघणाऱ्या सर्व इंडिगो देशांतर्गत विमानांची उड्डाणे रात्री 11.59 पर्यंत रद्द करण्यात आली आहेत. या अनपेक्षित निर्णयाचा गंभीर फटका बसलेल्या आमच्या सर्व मौल्यवान प्रवासी, ग्राहकांची आणि भागधारकांची आम्ही मनापासून माफी मागतो, असे इंडिगोने जारी केलेल्या पत्रात म्हटलं आहे. 

इंडिगोने जारी केलेल्या पत्रात प्रवाशांची माफी मागत म्हणले आहे की,“या अनपेक्षित निर्णयाचा आमच्या मौल्यवान प्रवासी आणि ग्राहकांवर गंभीर परिणाम झाल्याची आम्हाला जाणीव आहे. उड्डाण रद्द केल्याने झालेल्या गैरसोयीबद्दल आम्ही मनापासून दिलगीर आहोत.”एअरलाईनने प्रभावित प्रवाशांना अल्पोपहार,पुढील उपलब्ध उड्डाण पर्याय,हॉटेल निवास व्यवस्था,सामान परत मिळवण्यासाठी मदत,तसेच लागू असल्यास पूर्ण परतफेडउपलब्ध करून देण्याची माहिती दिली आहे.तसेच दिल्लीहून प्रवास करणाऱ्या प्रवाशांना सामान संकलनासाठी विमानतळावरील ग्राउंड स्टाफशी संपर्क साधण्याचे आवाहन करण्यात आले आहे. परतफेडीसाठी कंपनीच्या वेबसाइटला भेट देण्याचे आवाहनही करण्यात आले आहे.सर्व प्रवासी आमच्या वेबसाइटला https://www.goindigo.in/refund.html भेट देऊ शकतात किंवा मदतीसाठी आमच्या ग्राहक सेवेशी संपर्क साधू शकतात. प्रवाशांना होणारी मोठी गैरसोय आणि त्रास आम्हाला समजत आहे, गैरसोयीबद्दल आम्ही मनापासून दिलगीर आहोत, असे इंडिगोच्या प्रवक्त्यांनी जारी केलेल्या पत्रात म्हटलं आहे.

200 उड्डाणे रद्द; विमानतळांवर गर्दी

दरम्यान, काल गुरुवारी सलग तिसऱ्या दिवशी कर्मचाऱ्यांच्या कमतरतेचा सामना इंडिगोला करावा लागला असून देशभरातील विमान कंपनीच्या कामकाजावर गंभीर परिणाम झाला.कर्मचाऱ्यांच्या कमतरतेमुळे इंडिगोचे दिल्ली, मुंबई, कोलकाता, बेंगळुरू यांसारख्या प्रमुख विमानतळांवरील तब्बल 200 उड्डाणांवर परिणाम झाला आहे. अचानक रद्द झालेल्या उड्डाणांमुळे विमानतळावर रेल्वेसारखी रांग, जमाव आणि गोंधळाचे वातावरण निर्माण झाले. अनेक प्रवाशी लहान मुलांसह तासन्तास विमानतळावर अडकून पडले.

नाशिकमध्येही उड्डाण रद्द

इंडिगो विमान कंपनीच्या माध्यमातून अनेक फ्लाईट कॅन्सल झाल्याने प्रवाशांची मोठी अडचण झाली आहे. नाशिकच्या ओझर विमानतळावरुन सकाळी इंडिगोची 9 वाजताची विमानसेवा रद्द झाल्याची माहिती प्रवाशांना विमानतळावर गेल्यानंतर मिळाली. नाशिकचे काही व्यावसायिक व्यवसायाच्या कामानिमित्त दिल्लीला जाणार होते. ओझर विमानतळावरून सकाळी निघणारी इंडिगोची 9 वाजताची फ्लाईट देखील रद्द करण्यात आली. व्यवसायाच्या कामानिमित्त दिल्लीला जाणाऱ्या नाशिकमधील व्यावसायिकांना नंतर मुंबईमार्गे दिल्ली गाठण्याचा पर्याय निवडावा लागला. अचानक उड्डाण रद्द झाल्याने त्यांचे वेळेचे व आर्थिक नुकसान झाले असून त्यांनी संताप व्यक्त केला आहे.अचानक इंडिगो विमानसेवेमुळे या प्रवाशांची मोठी अडचण झाल्याने प्रवाशांनी नाराजी व्यक्त केली आहे. व्यावसायिक कामासाठी जावं लागणार असल्याने आर्थिक नुकसान देखील या प्रवाशांच झाले आहेत .