पुणे : पुणे जिल्ह्यातील जुन्नर आणि शिरूर तालुक्याच्या सरहद्दीवर असलेल्या पारगाव तर्फे आळे परिसरात बिबट्याच्या हल्ल्यात ८ वर्षीय चिमुकल्याचा दुर्दैवी मृत्यू झाल्याची धक्कादायक घटना घडली. या घटनेमुळे परिसरात भीतीचे वातावरण पसरले असून ग्रामस्थांमध्ये तीव्र संताप व्यक्त केला जात आहे.मृत मुलाचे नाव रोहित काफरे (वय ८) असे आहे. रोहित हा शेतमजूर कुटुंबातील मुलगा असून त्याचे आई-वडील शेतात कांदा लागवडीचे काम करत होते. यावेळी रोहित शेतालगत खेळत असताना ऊसाच्या शेतात दबा धरून बसलेल्या बिबट्याने अचानक त्याच्यावर झडप घातली. क्षणातच बिबट्याने रोहितला फरफटत नेऊन ठार केल्याची माहिती आहे.
घटनेची माहिती मिळताच ग्रामस्थांनी घटनास्थळी धाव घेतली; मात्र तोपर्यंत रोहितचा मृत्यू झाला होता. काफरे कुटुंबावर दुःखाचा डोंगर कोसळला असून संपूर्ण गावात शोककळा पसरली आहे. धक्कादायक बाब म्हणजे, गेल्या तीन महिन्यांत बिबट्याच्या हल्ल्यांमधील ही चौथी मृत्यूची घटना असल्याची माहिती समोर आली आहे. त्यामुळे नागरिकांमध्ये भीती वाढली असून “अजून किती निष्पाप बळी जाणार?” असा सवाल ग्रामस्थ उपस्थित करत आहेत.
घटनेनंतर वनविभाग आणि पोलीस प्रशासन घटनास्थळी दाखल झाले असून पुढील तपास सुरू आहे. ग्रामस्थांनी बिबट्याचा तात्काळ बंदोबस्त, पिंजरे लावणे, गस्त वाढवणे आणि परिसर सुरक्षित करण्याची जोरदार मागणी केली आहे. जुन्नर तालुक्यातील ग्रामीण भागात बिबट्यांच्या वाढत्या हल्ल्यांमुळे नागरिकांचे जीवन असुरक्षित झाले असून प्रशासनाने तातडीने ठोस उपाययोजना कराव्यात, अशी मागणी जोर धरत आहे.
दरम्यान, मागील काही दिवसांपासून पुणे शहर आणि परिसरात बिबट्या दिसल्याच्या चर्चा सुरू आहेत. काही ठिकाणी अफवा तर काही ठिकाणी प्रत्यक्ष माहिती समोर येत आहे. खराडी परिसरातही बिबट्या दिसल्याची माहिती पोलिसांना देण्यात आली होती. यानंतर पोलिसांनी नागरिकांना आवाहन करताना, बिबट्या दिसल्यास त्वरित कळवावे व अफवांवर विश्वास ठेवू नये, असे सांगत जनजागृती केली आहे.
