नाशिक : ऐन निवडणुकांच्या पार्श्वभूमीवर नाशिक जिल्ह्यात खळबळ उडवणारी घटना समोर आली आहे. नाशिक जिल्हा परिषदेचे माजी सदस्य कैलास किसन चौधरी (वय 52) यांचा संशयास्पद मृतदेह पळसे–शिंदे परिसरातील एका नाल्यात आढळून आला आहे. गेल्या पाच ते सहा दिवसांपासून ते बेपत्ता होते. या घटनेमुळे परिसरात भीतीचे वातावरण निर्माण झाले असून, राजकीय वर्तुळातही चर्चेला उधाण आले आहे.

कैलास चौधरी हे 11 डिसेंबर रोजी सकाळी कोणालाही न सांगता घरातून बाहेर पडले होते. मात्र त्यानंतर ते घरी परतले नाहीत. कुटुंबीयांनी नातेवाईक, परिचितांकडे चौकशी करूनही काहीही माहिती न मिळाल्याने नाशिक रोड पोलीस ठाण्यात बेपत्ता झाल्याची तक्रार दाखल करण्यात आली होती. त्यानुसार पोलिसांकडून त्यांचा शोध सुरू होता.

दरम्यान, गुरुवारी (दि. 18) सकाळी पळसे गावाजवळील एका पुलाखाली नाल्यात मृतदेह आढळून आल्याचे स्थानिक नागरिकांच्या निदर्शनास आले. त्यांनी तात्काळ नाशिक रोड पोलीस ठाण्याला माहिती दिली. माहिती मिळताच वरिष्ठ पोलीस निरीक्षक जितेंद्र सपकाळे हे पोलीस पथकासह घटनास्थळी दाखल झाले. पंचनामा करून मृतदेह बाहेर काढण्यात आला. प्राथमिक तपासात मृतदेह बेपत्ता असलेले माजी जिल्हा परिषद सदस्य कैलास चौधरी यांचाच असल्याचे निष्पन्न झाले.

मृतदेह आढळल्याची बातमी पसरताच घटनास्थळी मोठी गर्दी झाली होती. पोलिसांनी या प्रकरणी अकस्मात मृत्यूची नोंद केली असून, हा अपघाती मृत्यू आहे की घातपात, याचा सखोल तपास सुरू आहे. मृत्यूचे नेमके कारण शवविच्छेदन अहवालानंतरच स्पष्ट होणार असल्याचे पोलिसांनी सांगितले.निवडणुकीच्या काळात राजकीय पार्श्वभूमी असलेल्या व्यक्तीचा संशयास्पद मृत्यू झाल्याने नाशिक जिल्ह्यात एकच खळबळ उडाली आहे.