नवी मुंबई : नवी मुंबई महानगरपालिका निवडणुकीच्या पार्श्वभूमीवर भाजप आणि शिंदे गटातील तणाव चिघळल्याचे चित्र पाहायला मिळत आहे. कोपरखैरणे येथे सोमवारी दोन्ही पक्षांच्या कार्यकर्त्यांमध्ये झालेल्या राड्याचा व्हिडीओ सध्या सोशल मीडियावर व्हायरल झाला आहे. या घटनेत भाजपच्या कार्यकर्त्यांनी शिंदे गटाच्या एका कार्यकर्त्याला बेदम मारहाण केल्याचे व्हिडीओत स्पष्ट दिसत आहे.
भाजपकडून संबंधित शिंदे गटाचा कार्यकर्ता मतदारांना पैसे वाटत असल्याचा आरोप करण्यात आला आहे. या संशयावरून त्याला रंगेहाथ पकडल्याचा दावा भाजप कार्यकर्त्यांनी केला. यानंतर भाजप कार्यकर्त्यांनी त्याचे दोन्ही हात मागे पिरगळून धरत मारहाण केली. काही कार्यकर्ते त्याच्या थोबाडीत मारताना दिसत असून, फोन करण्याचा प्रयत्न करताच त्याचा मोबाईल हिसकावून घेण्यात आला.
या दरम्यान भाजपच्या एका कार्यकर्त्याने त्याचा गळा दाबल्याचा प्रकारही व्हिडीओत कैद झाला आहे. “मला मारू नका,” अशी विनवणी करत असतानाही त्याला मारहाण सुरूच होती. मात्र, हा कार्यकर्ता कसाबसा सुटून एकट्यानेच भाजप कार्यकर्त्यांना सामोरा गेल्याचे दिसून येते.
गेल्या काही दिवसांपासून उपमुख्यमंत्री एकनाथ शिंदे आणि भाजपचे मंत्री गणेश नाईक यांच्यातील राजकीय संघर्षामुळे नवी मुंबईतील वातावरण तापले आहे. मतदानाच्या तोंडावर घडलेल्या या घटनेमुळे भाजप आणि शिंदे गटातील तणाव आणखी वाढण्याची शक्यता वर्तवली जात आहे.
