मुंबई : मुंबई महानगरपालिका निवडणुकीत भाजपच्या तिकीटावर वॉर्ड क्रमांक 2 मधून निवडणूक लढवत असलेल्या तेजस्वी घोसाळकर या मतदानाच्या दिवशी भावूक झाल्याचे चित्र पाहायला मिळाले. घरातून मतदानासाठी निघण्यापूर्वी त्यांनी देवाची पूजा केली. त्यानंतर दिवंगत पती अभिषेक घोसाळकर यांच्या तसबिरीला नमन करताना त्यांना अश्रू अनावर झाले.
अभिषेक घोसाळकर यांची काही काळापूर्वी गोळ्या झाडून हत्या करण्यात आली होती. त्या धक्क्यानंतर प्रथमच तेजस्वी घोसाळकर या एकट्याने निवडणुकीच्या रिंगणात उतरल्या आहेत. अभिषेक घोसाळकर यांच्या तसबिरीसमोर नतमस्तक होताना त्यांनी हुंदका दिला.यावेळी बोलताना तेजस्वी घोसाळकर म्हणाल्या, “मला पहिल्यांदाच निवडणुकीला एकटीला सामोरे जावे लागत आहे. अभिषेक असायचा तेव्हा सगळी कामं तोच पाहायचा. आज त्याची खूप आठवण येतेय. पण त्याची साथ आणि आशीर्वाद माझ्यासोबत आहेत.”
तेजस्वी घोसाळकर या मुंबईतील वॉर्ड क्रमांक 2 मधून निवडणूक लढवत असून ही लढत प्रतिष्ठेची मानली जात आहे. निवडणुकीपूर्वी त्यांनी ठाकरे गटाला सोडून भाजपमध्ये प्रवेश केला होता. त्यांच्या विरोधात धनश्री कोलगे या निवडणूक रिंगणात उभ्या आहेत.मतदानाच्या दिवशी तेजस्वी घोसाळकर यांनी घरातून बाहेर पडण्यापूर्वी देवाची पूजा करून प्रचार आणि संघर्षाच्या या टप्प्यात आत्मविश्वास व्यक्त केला. वॉर्ड क्रमांक 2 मधील ही लढत राजकीयदृष्ट्या अत्यंत महत्त्वाची ठरत आहे.
