लातूर : लातूर महानगरपालिका निवडणुकीत मतदानाला उत्स्फूर्त प्रतिसाद मिळत असताना, ७७ वर्षीय श्रीमती सुमेधा सदाशिव दाते यांनी दाखवलेला उत्साह अनेकांसाठी प्रेरणादायी ठरतो आहे. वय हा केवळ आकडा आहे, हे त्यांनी आपल्या कृतीतून पुन्हा एकदा सिद्ध केले.
लातूर येथील प्रमोद गॅस एजन्सीच्या संचालिका असलेल्या सुमेधा दाते यांनी आयुष्यभर व्यवसाय, कुटुंब आणि समाज यांचा समतोल साधत किमान २०० लोकांना रोजगार व आधार दिला. आजही तोच आत्मविश्वास, तीच ऊर्जा आणि लोकशाहीबद्दलची तीच बांधिलकी त्यांच्या चेहऱ्यावर झळकत होती.
तरुण पिढीलाही लाजवेल असा जोश दाखवत त्यांनी मतदानाचा हक्क बजावला. “मतदान म्हणजे आपली जबाबदारी” हा संदेश त्यांनी कृतीतून दिला असून, ज्येष्ठ नागरिकांचा सहभाग लोकशाही अधिक बळकट करत असल्याचे हे उदाहरण ठरत आहे.लातूरमध्ये मतदान हा केवळ अधिकार न राहता एक सामाजिक कर्तव्य आणि उत्सव बनत असल्याचे हे दृश्य बोलके ठरत आहे.
