पुणे - वाकड येथील वेदांता सोसायटीमध्ये भारताचा ७७ वा गणतंत्र दिन मोठ्या उत्साहात आणि देशभक्तीच्या वातावरणात साजरा करण्यात आला. कार्यक्रमाची सुरुवात सोसायटीतील लहानग्यांनी काढलेल्या भव्य रॅलीने झाली. तिरंगा हाती घेऊन देशभक्तीपर घोषणांनी परिसर दुमदुमून गेला.
यानंतर पारंपरिक पद्धतीने ध्वजारोहण समारंभ पार पडला. ध्वजारोहणानंतर सोसायटीतील कलाप्रेमी मुलांनी देशभक्तीपर गीत, नृत्य आणि विविध सांस्कृतिक कार्यक्रम सादर करून उपस्थितांची मने जिंकली. या सांस्कृतिक कार्यक्रमांचे सूत्रसंचालन अस्मिता रुद्रवार आणि हेमांगी कुलकर्णी यांनी केले.
यावेळी वेदांता सोसायटीचे अध्यक्ष डॉ. सोमनाथ धोंडे यांनी रहिवाशांना संबोधित करताना गणतंत्र दिनाचे ऐतिहासिक महत्त्व सांगितले तसेच समाजात एकोपा, सामूहिक भावना आणि नागरिकांची जबाबदारी यावर भर दिला.या कार्यक्रमाच्या यशस्वी आयोजनासाठी प्रमोद भोसले, सुमंत देशपांडे, पराग रुद्रवार, मयूर वाघमारे, मदन पाटील, गौरव मानकर आणि निखिल मुळे यांनी विशेष परिश्रम घेतले.सामूहिक भावना, देशप्रेम आणि सामाजिक ऐक्य वृद्धिंगत करण्यासाठी वेदांता सोसायटीने राबवलेले हे आयोजन सर्वांसाठी प्रेरणादायी ठरले.
