बारामती : राज्याचे उपमुख्यमंत्री अजित पवार यांचा बारामती विमान अपघातात मृत्यू झाला आहे. बुधवारी सकाळी बारामती विमानतळाजवळील खोलगट भागात लियरजेट 45 XR विमान कोसळले. यामध्ये अजित पवारांसह पाच जणांचा मृत्यू झाला आहे.

 राज्याचे उपमुख्यमंत्री आणि धडाडीचे नेते म्हणून ओळख असणारे अजित पवार यांचा विमान अपघातामध्ये मृत्यू झाला. बुधवारी सकाळी बारामतीमध्ये झालेल्या विमान अपघातामध्ये अजित पवारांसह पाच जणांचा मृत्यू झाला आहे. अजितदादा आपली सर्व कामे उरकून सकाळी 8 वाजून 10 मिनिटांनी मुंबईतून निघाले. बारामतीत लँडिंगवेळी, 8 वाजून 46 मिनिटांनी त्यांच्या विमानाचा अपघात झाला. या अपघातामुळे अवघा महाराष्ट्र सुन्न झाल्याचं दिसून येतंय. जिल्हा परिषदेच्या निवडणुकीच्या पार्श्वभूमीवर बुधवारी बारामतीमध्ये अजित पवार यांच्या चार सभा होत्या. या सभांसाठी ते सकाळीच नेहमीप्रमाणे लवकर बाहेर पडले होते. मुंबईहून बारामतीसाठी सकाळी विमान निघालं होतं. यादरम्यान लँडिंगदरम्यान बारामतीमध्ये विमानाचा अपघात झाला. विमानाचा अपघात इतका भीषण होता की, त्यामध्ये अजित पवारांसह सर्वांचा मृत्यू झाला. 

 खोलगट भागात विमान कोसळलं

अजित पवारांच्या विमानाचा अपघात बारामती एअरपोर्ट पासून दोन ते तिन किलोमीटर अंतरावर झाला. विमानात ऐनवेळी झालेल्या बिघाडामुळे विमान धावपट्टीवर लँड होऊ शकले नाही. एअरपोर्ट पासून पुढे दोन ते तिन किलोमीटर अंतरावर असलेल्या उतारावरील जमिनीवर जाऊन हे विमान कोसळले.

जिथे हे विमान कोसळले तिथे खोलगट भाग आहे. आजुबाजुला झाडं झूडपं आणि उस शेती आहे. शेजारी काही घरांची वस्ती आहे. या विमानाचा जळून कोळसा झाला. मात्र आश्चर्याची बाब म्हणजे विमानातील कागदपत्रं सहिसलामत राहिलीत. कदाचित विमान जमिनीवर कोसळल्यानंतर विमानाचे दोन तूकडे झाले आणि कागदपत्रं बाहेर फेकली गेली.

अपघाताचा तपशील:

सकाळी 8:10: मुंबईहून बारामतीसाठी विमान उड्डाण केले.

सकाळी 8:40: विमान बारामती एअरस्ट्रीपच्या जवळ असताना तांत्रिक बिघाड झाला.

सकाळी 8:46: विमानाचे नियंत्रण सुटले आणि बारामतीतील गोजुबावी परिसरातील शेतात कोसळले.

अपघात ठिकाण आजूबाजूला झाडं, झुडपं आणि उसाची शेती असलेला खोलगट भाग होता. विमान कोसळल्यानंतर भीषण आग लागली. विमानातील सर्वांचा जागीच मृत्यू झाला.

विमानातील प्रवासी:

अजित पवार

वदीप जाधव

पिंकी माळी

कॅप्टन सुमित कपूर

कॅप्टन शांभवी पाठक

अपघाताचे कारण:

पुणे-बारामती परिसरात दाट धुके आणि कमी दृश्यमानता.

बारामती विमानतळ लहान असून, ILS सुविधा नाही.

पायलटला मॅन्युअल लँडिंग करावी लागली.

रनवेवर पोहोचण्याआधी विमान जमिनीला आदळले, ज्यामुळे भीषण स्फोट आणि आग लागली.

 घड्याळामुळे ओळख पटली

अजित पवारांच्या मृतदेहाची ओळख पटवण्यासाठी कारणीभूत ठरलं ते त्यांच्या मनगटावरचं घड्याळ. राजकीय क्षेत्राचा विचार केला तर घड्याळ हेच चिन्ह घेऊन राष्ट्रवादीचा पर्यायाने अजित पवारांचा प्रवास, त्यांची राजकीय कारकीर्द चढत्या क्रमाने पुढे जात राहिली. पुढे राष्ट्रवादीचे दोन पक्ष झाल्यानंतरही घड्याळ हे चिन्ह त्यांच्याकडेच राहिलं आणि आज मनगटावरच्या घड्याळाने त्यांच्या मृतदेहाची शेवटची ओळख पटणं, हा नियतीचा क्रूर खेळ म्हणावा की आणखी काही हेच कळत नाही.अजित पवार यांची ओळख त्यांचे मनगटावरचे घड्याळ पाहून झाली, जे त्यांच्या राजकीय जीवनाचे प्रतीक मानले जात असे.सध्या DGCA अपघाताची चौकशी करत आहे, अहवालानंतरच अंतिम कारण स्पष्ट होईल.