बीड: राज्याचे दिवंगत उपमुख्यमंत्री अजित पवार यांच्या निधनानंतर विविध ठिकाणी त्यांच्या अस्थींचे विधीपूर्वक विसर्जन सुरू आहे. याच पार्श्वभूमीवर बुधवारी बीड जिल्ह्यातील गोदावरी नदीत त्यांचा अस्थिकलश विसर्जित करण्यात आला. विशेष बाब म्हणजे, अजित पवार बीड दौऱ्यावर येताना ज्या मर्सिडीज कारमधून प्रवास करायचे, त्याच वाहनातून त्यांचा अस्थिकलश विसर्जनस्थळी नेण्यात आला.
सकाळी १० वाजता राष्ट्रवादी काँग्रेसच्या मध्यवर्ती कार्यालयात कार्यकर्ते व नागरिकांसाठी अस्थिदर्शनाची व्यवस्था करण्यात आली होती. यावेळी आमदार धनंजय मुंडे, विजयसिंह पंडित, प्रकाश सोळंके तसेच माजी आमदार आणि मोठ्या संख्येने पक्षकार्यकर्ते उपस्थित होते. सर्वांनी भावपूर्ण श्रद्धांजली वाहिली.त्यानंतर शनी मंदिर परिसरातील गोदावरी नदीकाठी विधी पार पाडून अस्थी विसर्जन करण्यात आले. यावेळी कृत्रिम बुद्धिमत्तेच्या (AI) माध्यमातून तयार करण्यात आलेला ऑडिओ संदेश वाजवण्यात आला, ज्यामुळे वातावरण अधिकच भावूक झाले.
अजित पवार यांचे २८ जानेवारी रोजी बारामतीकडे येताना विमान अपघातात निधन झाले होते. २९ जानेवारी रोजी बारामती येथील विद्या प्रतिष्ठानच्या मैदानावर त्यांच्यावर शासकीय इतमामात अंत्यसंस्कार करण्यात आले होते.
