मुंबई : राष्ट्रीय स्वयंसेवक संघाच्या शताब्दी वर्षानिमित्त शहरात दोन दिवसीय विशेष व्याख्यानमालेचे आयोजन करण्यात आले आहे. या कार्यक्रमाच्या पहिल्याच दिवशी बॉलीवूडचा सुपरस्टार सलमान खान उपस्थित राहिल्याने मोठी चर्चा रंगली.मुंबईतील नेहरू सेंटर येथे सुरू झालेल्या या कार्यक्रमाचे नाव ‘नवे क्षितिज’ असे ठेवण्यात आले आहे. संघाच्या वैचारिक भूमिकेवर आधारित व्याख्याने, चर्चासत्रे आणि सांस्कृतिक कार्यक्रम येथे होणार आहेत. उद्घाटन सोहळ्याला चित्रपटसृष्टीतील अनेक मान्यवर चेहरे उपस्थित होते.
दिग्दर्शक सुभाष घई, अभिनेते रणबीर कपूर, ज्येष्ठ अभिनेत्री हेमा मालिनी तसेच अश्विनी भावे यांसारख्या कलावंतांनी हजेरी लावली. मात्र, सलमान खान कार्यक्रमस्थळी पोहोचताच सर्वांचे लक्ष त्याच्याकडे वेधले गेले. कॅमेरे आणि उपस्थितांची गर्दी त्याच्याभोवती जमा झाल्याचे पाहायला मिळाले.या उपस्थितीमुळे सलमान खान हा या आरएसएस कार्यक्रमाचा सर्वात चर्चेचा विषय ठरला असून, त्याच्या सहभागामुळे कार्यक्रमाला वेगळेच ग्लॅमर मिळाल्याचे मानले जात आहे.
