बदलापूर :  बदलापूर परिसरात घरातूनच बेकायदेशीर पद्धतीने महिलांची स्त्रीबीज (अंडाणू) संकलन करून त्यांची विक्री केल्याचा गंभीर प्रकार उघडकीस आला आहे. या प्रकरणी बदलापूर पूर्व पोलीस ठाण्यात तीन महिलांविरोधात गुन्हा दाखल करण्यात आला असून पोलिसांनी त्यांना अटक केली आहे. घटनेमुळे परिसरात खळबळ उडाली आहे.

घरातून सुरू होता संशयित व्यवसाय

मिळालेल्या माहितीनुसार, मुख्य आरोपी महिलेच्या घरात स्त्रीबीज वाढीसाठी वापरली जाणारी औषधे व इंजेक्शन्स बेकायदेशीररीत्या साठवून ठेवण्यात आली होती. आर्थिक अडचणीत असलेल्या महिलांना पैशांचे आमिष दाखवून त्यांना या प्रक्रियेसाठी प्रवृत्त केले जात असल्याचा आरोप आहे. वैद्यकीय सल्ल्याविना सोनोग्राफी करून संबंधित औषधोपचार देण्यात येत असल्याची माहिती प्राथमिक तपासात समोर आली आहे.

IVF केंद्रांमार्फत स्त्रीबीज संकलन

उपचारानंतर संबंधित महिलांना IVF किंवा ART केंद्रांकडे पाठवण्यात येत होते. तेथे वैद्यकीय प्रक्रियेद्वारे स्त्रीबीज काढण्यात येत असल्याचा आरोप असून त्यानंतर त्यांची बेकायदेशीर विक्री होत असल्याची शक्यता व्यक्त केली जात आहे. या प्रक्रियेत महिलांचे शारीरिक तसेच आर्थिक शोषण झाल्याचा संशय आहे.

आरोग्य विभागाची कारवाई

बदलापूर उपजिल्हा रुग्णालयाच्या पथकाने छापा टाकल्यानंतर हा प्रकार उघडकीस आला. त्यानंतर आरोग्य विभागाच्या तक्रारीवरून पोलिसांनी गुन्हा दाखल केला.

मोबाईलमधून महत्त्वाचे पुरावे

प्राथमिक तपासात आरोपींच्या मोबाईलमध्ये औषधांचे फोटो, सोनोग्राफी अहवालांचे छायाचित्र, काही महिलांच्या नावांवर तयार केलेली कागदपत्रे आणि आर्थिक व्यवहारांची माहिती आढळल्याचे सूत्रांनी सांगितले. या प्रकरणाचा विस्तार अधिक मोठा असण्याची शक्यता नाकारता येत नाही.

तिघींना अटक, पुढील तपास सुरू

या प्रकरणी तीन महिलांना अटक करण्यात आली असून बदलापूर पूर्व पोलीस अधिक तपास करत आहेत. संबंधित IVF केंद्रांचीही चौकशी होण्याची शक्यता आहे.दरम्यान, अधिकृत तपास पूर्ण होईपर्यंत सर्व आरोप संशयाच्या आधारे असल्याचे पोलिसांकडून स्पष्ट करण्यात आले आहे.