सोलापूर : सोलापूर शहरात एक अत्यंत गंभीर आणि संतापजनक घटना उघडकीस आली आहे. लोकमान्य नगर परिसरात एका विवाहित महिलेला तिच्याच पतीने पेट्रोल टाकून जाळण्याचा प्रयत्न केल्याची माहिती समोर आली आहे. या घटनेत महिला गंभीररीत्या भाजली असून तिच्यावर सध्या शासकीय रुग्णालयात उपचार सुरू आहेत.
माहितीनुसार, नर्गिस शेख (वय ३६) आणि फैजान शेख यांचा विवाह सप्टेंबर २०२४ मध्ये झाला होता. लग्नानंतर काही महिन्यांपर्यंत त्यांचा संसार सुरळीत सुरू होता. मात्र त्यानंतर दोघांमध्ये मतभेद वाढत गेले आणि ते वेगवेगळे राहत होते. विशेषतः तलाकच्या मुद्द्यावरून त्यांच्यात वारंवार वाद होत असल्याचे समोर आले आहे.
बुधवारी रात्री सुमारे साडेनऊच्या सुमारास आरोपी फैजान शेख हा पत्नीच्या घरी आला. पत्नीशी बोलायचे असल्याचे सांगून त्याने तिला घरातील एका खोलीत नेले. या दरम्यान दोघांमध्ये पुन्हा वाद झाला. संतापाच्या भरात त्याने सोबत आणलेल्या पेट्रोलची बाटली काढून पत्नीच्या अंगावर ओतली आणि लाईटरच्या सहाय्याने तिला पेटवून दिले.
आग लागल्यानंतर महिला जीव वाचवण्यासाठी बाहेर धावत आली. तिच्या ओरडण्याचा आवाज ऐकून कुटुंबीय आणि शेजाऱ्यांनी तातडीने मदत केली आणि तिला उपचारासाठी रुग्णालयात दाखल केले. घटनेनंतर आरोपी घटनास्थळावरून फरार झाला आहे.
या प्रकरणाची माहिती मिळताच सोलापूर पोलिसांनी घटनास्थळी धाव घेतली असून पुढील तपास सुरू आहे. आरोपीविरोधात गुन्हा नोंदवण्याची प्रक्रिया सुरू असल्याची माहिती पोलिसांकडून देण्यात आली आहे.
